Հայաստանում ակնաբուժության մակարդակն այսօր ավելի բարձր է, քան հարեւան երկրների մեծամասնությունում, այդ պատճառով Հայաստանը կարող է ակնաբուժության տարածաշրջանային կենտրոն դառնալ: Այդ մասին, հանդես գալով ակնաբուժական միջազգային «Բժշկական կրթություն, հիվանդների խնամք եւ բուժման նոր մեթոդներ» համաժողովի բացմանն ասել է Կալիֆորնիայի համալսարանի դոցենտ, Armenian Eye Care Project-ի հիմնադիր Ռոջեր Օհաննիսյանը:
Համաժողովը, որը հուլիսի 1-ին ընթանում է Երեւանում, ԱՄՆ-ից եւ Հայաստանից ավելի քան հարյուր ակնաբույժի է համախմբել: NEWS.am Medicine-ի թղթակցի հետ զրույցում Ռոջեր Օհաննիսյանը նշել է, որ նման համաժողովները ծայրաստիճան կարեւոր են, որովհետեւ մասնագետներին հնարավորություն են տալիս նոր բան իմանալու, իսկ հետո ստացած գիտելիքը փոխանցելու այլ գործընկերների:
Համաժողովին դասախոսություններով հանդես են գալիս ոչ միայն հայտնի մասնագետներ, այլեւ երիտասարդ բժիշկներ, որոնք կպատմեն նոր տեխնիկաների մասին, որոնք յուրացրել են վերջին ժամանակներս: Պրոֆեսոր Ռիչարդ Հիլլը Կալիֆորնիայի համալսարանից գործընկերներին պատմել է գլաուկոմայի բուժման երկու նոր մոտեցման մասին, իսկ Խոդամ Ռոստոմյանը Kaiser Permanente Antelope Valley (ԱՄՆ) ինստիտուտից պատմել է Առողջության բարելավման ինստիտուտի փորձի եւ գործունեության մասին:
Հայ մասնագետներն իրենց հերթին պատմել են սեփական փորձի եւ ակնաբուժական մի շարք հիվանդությունների, այդ թվում` գլաուկոմայի, դիաբետիկ ռիտինոպաթիայի եւ եղջերաթաղանթի վարակիչ խոցերի բուժման սեփական մոտեցումների մասին:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր