Արտաքինի եւ մաշկի հետ կապված որոշ խնդիրների պատճառն իրականում կարող են լինել հորմոնային խախտումները: Այդ պատճառով, եթե Ձեր մարմնին ավելորդ մազեր են հայտնվել, եթե մաշկի վիճակը կտրուկ վատացել է, գուցե անհրաժեշտ է ոչ թե կոսմետոլոգին դիմել, այլ ընտանեկան բժշկին, էնդոկրինոլոգին կամ գինեկոլոգին:
Որոշ «արտաքին» ախտանիշների մասին, որոնց դեպքում անհրաժեշտ է բժշկին դիմել, մեզ պատմել է գինեկոլոգ Տաթեւիկ Ղորուխչյանը:
1. Մարմնի վրա մազեր
Եթե կնոջ մարմնի վրա «տղամարդկային» տեսակի ավելորդ մազեր են հայտնվում, դա կարող է վկայել հորմոնային խախտումների մասին: Այդ պատճառով միայն մազահեռացման միջոցով այդ մազերից ազատվելն այնքան էլ արդյունավետ չի լինի. եթե խանգարման պատճառը չհեռացվի, ավելորդ մազերը նորից ու նորից կհայտնվեն:
2. Գլխի մազերը
Գլխի մազերի վիճակի անսպասելի փոփոխությունը, դրանց թափվելը եւս կարող է վկայել հորմոնային խախտումների կամ այլ խնդիրների մասին: Այդ պատճառով, եթե խնդիրն ինքնին չի անցնում կարճ ժամանակամիջոցի ընթացքում, ցանկալի է ցույց տալ բժշկին:
3. Քաշ
Քաշի փոփոխությունը (եթե դրա համար ջանքեր չեն գործադրվել) եւս կարող է օրգանիզմում խնդիրների ախտանիշ լինել. զգուշանալու առիթ պետք է դառնա ինչպես քաշի կտրուկ ավելացումը (այդ թվում` տեղային.ճարպերի կուտակումը մեկ հատվածում), այնպես էլ կտրուկ նվազումը:
4. Մաշկը
Մաշկի գույնի եւ պիգմենտացիայի փոփոխությունը, ինչպես նաեւ ակնեի ի հայտ գալը (նույնիսկ պատանեկան հասակում) եւս բժշկին դիմելու առիթ է, կարծում է գինեկոլոգը:
5. Դաշտանային ցիկլ
Դաշտանային ցիկլի խանգարումը եւս բժշկին դիմելու առիթ է, որովհետեւ դա եւս կարող է հորմոնային համակարգի հետ կապված խնդիրներ մատնանշել, հայտնել է մասնագետը:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր