Հայաստան «Hipp Organic» չի ներկրվում. ընկերության ներկայացուցիչ

Երեխաների «Hipp Organic» նախաճաշերը, որոնցում վերջերս մետաղական լար են գտել, Հայաստան չեն ներկրվում եւ երբեք չեն ներկրվել: Այս մասին NEWS.am Medicine-ի թղթակցին ասաց Հայաստանում Hipp-ի բժշկական ներկայացուցիչ Ռուզաննա Կարապետյանը:

Նրա խոսքով՝ մետաղական լարը հայտնաբերվել է Գերմանիայում, Hipp Organic ցորենային նախաճաշում, եւ անվտանգության նկատառումներից ելնելով՝ այդ արտադրանքը ներկրող բոլոր երկրներին հաղորդագրություն է ուղարկվել այդ խմբաքանակից բոլոր տուփերի հետկանչի մասին: Բայց քանի որ Հայաստան այդ արտադրանքը չի ներկրվում, ընկերության ներկայացուցչի խոսքով, իրենց այդ հաղորդագրությունը չի վերաբերում:

Հիշեցնենք, որ մանկական սնունդ արտադրող գերմանական Hipp-ը նախաճաշերը շուկայից հետ է կանչել այն բանից հետո, երբ դրանցում մետաղական լար են հայտնաբերել: Հետկանչի ենթակա են L190416 / L020616 / L200417 / L030616 համարներով խմբաքանակի եւ 19.01-03.03.2017 իրացման ժամկետով 140 գրամանոց տուփերով նախաճաշերը:
Նշենք նաեւ, որ փաստի առիթով հետաքննություն  է սկսվել, անհրաժեշտ միջոցառումներ են ձեռնարկվում: Տուժածների մասին տեղեկություններ չկան:

Սննդամթերքի անվտանգության հայկական տեսչությունը նույնպես հետաքննում է հարցը: Տեսչությունից մեզ տեղեկացրեցին, որ երկուշաբթի մասնագետները հանդես կգան պաշտոնական մեկնաբանությամբ:

Հետևեք NEWS.am Medicine-ին Facebook-ում և Twitter-ում