• Latest news

Այսօր Օստեոպորոզի կանխարգելման համաշխարհային օրն է

20 հոկտեմբերի, 2016  22:37

Ամեն տարի ողջ աշխարհում հոկտեմբերի 20-ը նշվում է որպես Օստեոպորոզի կանխարգելման համաշխարհային օր, որի նպատակն է բարձրացնել հասարակության իրազեկությունը հիվանդության մասին` կոչ անելով պահպանել անհրաժեշտ միջոցառումները, ժամանակին ախտորոշել եւ սկսել բուժումը:

Օստեոպորոզը մարդու ոսկրային համակարգի ամենատարածված հիվանդություններից է, որը խոշոր առողջապահական խնդիր է: Այն բնութագրվում է ոսկրերի ցածր խտությամբ, ոսկրային հյուսվածքի թուլացմամբ եւ դրա կառուցվածքի խախտմամբ, ոսկրերի ամրության իջեցմամբ եւ կոտրվածքների առաջացման հավանականության աճով: Կոտրվածքները եւ դրանց բարդություններն օստեոպորոզի լուրջ կլինիկական հետեւանքներն են: Առավել հաճախ կոտրվում են ողերը (ողնաշար), ազդրի պրոքսիմալ հատվածը (ազդրոսկր) եւ նախաբազկի դիստալ հատվածը (դաստակ): Մեծահասակ հիվանդների մոտ կոտրվածքների մեծ մասը տեղի են ունենում ոսկրերի ցածր խտության հետեւանքով, նույնիսկ, եթե վնասվածքը եղել է ոչ լուրջ: Ցանկացած ոսկրային խոշոր նոր կոտրվածք 50 եւ ավելի մեծ տարիքի մարդկանց մոտ պետք է լուրջ պատճառ դառնա հետագայում հետազոտվելու, օստեոպորոզն ախտորոշելու եւ բուժելու համար:

Ոսկրերի պարագայում առողջ սնուցման երեք բաղադրիչն են` կալցիումը, վիտամին «Դ»-ն եւ սպիտակուցը: Կալցիումն անհրաժեշտ է ոսկրի զանգվածի կուտակման համար: Կաթնամթերքը, ձկնեղենը, կանաչեղենը, սալորաչիրը մեծ քանակությամբ կալցիում են պարունակում: Վիտամին «Դ»-ն, ինչը ստանում ենք արեւի ճառագայթներից եւ ձկնեղենից, նպաստում է կալցիումի ներծծմանը: Սպիտակուցը կարեւոր է ոսկրային հյուսվածքի ձեւավորման համար:

Մասնագետները մեծ կարեւորություն են տալիս հավասարակշռված սննդի կիրառությանը վաղ մանկական տարիքից ի վեր, ճիշտ սննդակարգը կարեւոր է հենաշարժողական համակարգի ճիշտ ձեւավորման համար:

Տարիքով պայմանավորված կալցիումի դեֆիցիտը բացասաբար է ազդում ոսկրերի որակի վրա, խանգարում է երեխայի աճը, առաջացնում է ռախիտի նշաններ,  հանգեցնում աճի դանդաղեցման, երբեմն օստեոպենիայի ձեւավորման: Ոսկրը հասնում է առավել զարգացման մինչեւ 30 տարեկանը: Զրոյից մինչեւ 25-30 տարեկանը ձեւավորվում է, այսպես կոչված, ոսկրային զանգվածի «գագաթնակետը»: Դրանից հետո աստիճանաբար սկսվում է ոսկրային զանգվածի կորուստ, ինչն առավել արագ է ընթանում 50-60 տարեկան անձանց շրջանում:

Ամբողջ աշխարհում մասնագետները խորհուրդ են տալիս կանխարգելել օստեոպորոզի բարդությունները` ճիշտ սննդակարգի սահմանումով, ժամանակին ախտորոշիչ հետազոտություններ անցնելով:

Հայաստանում օստեոպորոզի եւ դրա բարդությունների կանխարգելման ուղղությամբ մեծ ջանքեր են գործադրում հասարակական կազմակերպությունները:

Հետևեք NEWS.am Medicine-ին Facebook-ում և Twitter-ում


 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է