Գիտական հետազոտություններով քանիցս հաստատվել է օրգանիզմի համար դառը շոկոլադի օգտակարությունը: Այն հարուստ է հակաօքսիդանտներով, ուստի բժիշկները խորհուրդ տալիս այն օգտագործել նույնիսկ դիետայի հետեւողների. դառը շոկոլադը նվազեցնում է սիրտ-անոթային հիվանդությունների եւ շաքարախտի առաջացման հավանականությունը:
Սակայն շատերը շոկոլադի այս տեսակը չեն սիրում, քանի որ կակաոյի մեծ պարունակության պատճառով այն դառնահամ է: Կաթնային շոկոլադն այս թերությունը չունի, սակայն նաեւ հակաօքսիդանտներ էականորեն քիչ է պարունակում: Հյուսիսային Քարոլինայի համալսարանի գիտնականները կարողացել են հաճելին օգտակարի հետ համատեղել:
Համալսարանի աշխատակիցները մշակել են կաթնային շոկոլադի պատրաստման նոր տեխնոլոգիա, որի դեպքում այն դառնում է նույնքան օգտակար, որքան դառը շոկոլադը, իսկ դրա հետ մեկտեղ համն է պահպանում: Հետազոտողները շոկոլադին նոր բաղադրամաս են հավելել՝ գետնանուշի կեղեւի էքստրակտ: «Ընկույզի» այս հատվածը սովորաբար թափում են, սակայն գիտնականները կեղեւից ֆենոլային միացություններ են անջատել, այնուհետեւ դրանք մալտոդեքստրինի փոշու հետ ավելացրել կաթնային շոկոլադին՝ այն պատրաստվելու ընթացքում:
Պատրաստի արտադրանքը 80 մարդ է փորձել, նրանց խնդիրն էր՝ պարզել, արդյո՞ք նոր հավելուկով շոկոլադը տարբերվում է այն չպարունակող շոկոլադից: Արդյունքների համաձայն՝ երկու տեսակի շոկոլադը հավանել են գրեթե նույնքան մարդիկ:
Շոկոլադի նոր բաղադրատոմսն ամբողջ աշխարհում ոչ միայն կօգնի քաղցրեղենի սիրահարներին ավելի առողջ լինել, այլեւ հնարավորություն կընձեռի գետնանուշն ամբողջությամբ օգտագործել, որի կեղեւն այլեւս հարկ չի լինի դեն նետել:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր