Առավոտյան 5 սովորույթ, որոնց պատճառով չի հաջողվում նիհարել

Եթե Դուք հրաժարվել եք արագ սննդից եւ սկսել եք սպորտով զբաղվել, բայց Ձեր քաշը դեռ չի նվազում, հնարավոր է՝ մեղավորն ամենօրյա սովորույթներն են, որոնց ուշադրություն չեք դարձնում: Ձեր ուշադրությանն ենք ներկայացնում առավոտյան մի քանի սովորույթ, որոնք կարող են դանդաղեցնել նիհարելու գործընթացը:

Նախաճաշի անտեսում

Ոմանք նախընտրում են առավոտյան չնախաճաշել, այլ միայն սուրճ կամ թեյ խմել: Այս սովորույթը ոչ միայն խանգարում է նիհարել, այլեւ կարող է նպաստել ավելորդ քաշ հավաքելուն: Բանն այն է, որ երբ չեք նախաճաշում, օրվա ընթացքում սկսում եք ուժեղ քաղց զգալ եւ շաքարով ու ճարպերով վնասակար սնունդ ուտել: Եթե ուզում եք նիհարել կամ պահպանել քաշը, մասնագետները խորհուրդ են տալիս անպայման նախաճաշել:

Քնի ավելցուկ

Շատ ենք լսել այն մասին, որ քնի պակասը հանգեցնում է ավելորդ քաշի, բայց պարզվում է, որ քնի ավելցուկը նույն արդյունքն է ունենում: PLoS ONE ամսագրում հրապարակված հետազոտության համաձայն՝ գիշերն ավելի քան 10 ժամ քնող մարդիկ մարմնի մեծ զանգված ունեն՝ 7-9 ժամ քնողների համեմատ:

Չհավաքված անկողին

National Sleep Foundation-ի գիտնականները պարզել են, որ այն մարդիկ, որոնք հավաքում են իրենց անկողինը, ավելի հաճախ լավ են քնում, հետեւաբար՝ ավելի հեշտությամբ են հետեւում իրենց քաշին: Չնայած այս կապն այնքան էլ հասկանալի չէ, ամեն դեպքում, փորձեք արթնանալուց հետո հավաքել անկողինը:

Մութ ննջարան

Հետազոտողները պարզել են, որ այն մարդիկ, որոնք ննջարանն առավոտյան ողողվում է արեւի լույսով, սովորաբար մարմնի փոքր զանգված ունեն, քան նրանք, ովքեր մթության մեջ են արթնանում: Այդ պատճառով պետք չէ ննջասենյակի պատուհանները հաստ վարագույրներով ծածկել, թող առավոտյան Ձեզ արթնացնեն արեւի ճառագայթները:

Կշռվելու ցանկության բացակայություն

Obesity ամսագրում հրապարակված հետազոտությունը ցույց է տվել, որ առավոտյան կանոնավորապես կշռվելու դեպքում ավելի հեշտ է վերահսկել քաշը: Առավոտը կշռվելու լավագույն ժամանակն է, քանի որ գիշերվա քնից հետո օրգանիզմում քիչ ջուր է մնում, եւ քաշն ավելի ճիշտ է լինում:

Հետևեք NEWS.am Medicine-ին Facebook-ում և Twitter-ում