Չինաստանը Հայաստանին եւս 200 շտապ օգնության մեքենա կտրամադրի

Հայաստանի Հանրապետությունում Չինաստանի Ժողովրդական Հանրապետության արտակարգ եւ լիազոր դեսպան Թիան Էրլունի եւ առեւտրային խորհրդական Վանգ Հոնգլենգի հետ հանդիպման ժամանակ ՀՀ առողջապահության նախարար Լեւոն Ալթունյանը բարձր է գնահատել  առողջապահության բնագավառում երկու երկրի համագործակցությունը։ Առանձնակի կարեւորվել են 2011թ. Հայաստանին շտապօգնության 88 մեքենայի տրամադրումը եւ Չինաստանում հայ բժիշկների, առողջապահության կազմակերպիչների, դեղագետների վերապատրաստումը, այդ թվում ավանդական բժշկության ուղղությամբ:

Լեւոն Ալթունյանը շնորհակալություն է  հայտնել չինական կողմին` որպես օգնությունՀայաստանին շտապ օգնության եւս 200 մեքենա տրամադրելու պատրաստակամություն հայտնելու համար:  «Դրա շնորհիվ կկարողանանք լիովին լուծել մեր երկրի շտապ օգնության ծառայությունում առկա խնդիրները»,-ասել է նախարարը` ընդգծելով, որ ինչպես նախկինում, այնպես էլ առաջիկայում ստացված մեքենաների զգալի մասը կաշխատեն մարզերում: 

Դեսպանի խնդրանքով նախարարը ներկայացրել է առողջապահական համակարգում ծրագրվող բարեփոխումներն ու հեռահար նպատակները։ 

Թիան Էրլուն նշել է, որ չինական կողմը պատրաստ է աջակցելու նաեւ հեռաբժշկության ոլորտում` ապահովելով մասնագիտական խորհրդատվություն։

Երկուստեք կարեւորվել է առողջապահության ոլորտում  համագործակցության զարգացումն ու ընդլայնումը։

Հետևեք NEWS.am Medicine-ին Facebook-ում և Twitter-ում