Ավստրալիայում նիհարել ցանկացող որոշ կանայք սկսել են այնպիսի նյութերով սննդային հավելումներ օգտագործել, որոնք պարունակվում են հղի կնոջ ընկերքում եւ մեզի մեջ: Խոսքը մարդու քորիոնիկական գոնադոտրոպիայի (HCG) մասին է, որը 1970-ական թվականներին շատ տարածված էր:
Ճարպակալման բուժման մասնագետները տագնապով հայտնում են, որ որոշ կլինիկաներ նիհարելու համար իրենց հիվանդներին այդպիսի հավելումներ են նշանակում ցածրկալորիական դիետաներին զուգահեռ: Սակայն այդ ամենը ոչ միայն նիհարելուն չի օգնի, այլեւ կարող է վնասել առողջությունը:
Baker IDI Heart and Diabetes Institute-ի (Ավստրալիա) ճարպակալման բաժանմունքի պրոֆեսոր Ջոն Դիքսոնը ընդգծում է, որ HCG-ի վրա հիմնված դիետաները չեն գործում: Նա դրանք խարդախություն է համարում, քանի որ գիտական բազմաթիվ հետազոտություններով պարզվել է, որ այդ սննդային հավելումները նիհարելուն չեն նպաստում, չեն փակում ախորժակը եւ չեն լավացնում տրամադրությունը:
Նրա հետ համաձայն է PR մասնագետ Էլիզաբեթ Մայերը, որն անձամբ է փորձել այդպիսի հավելումներ օգտագործել: Նրա խոսքով՝ համացանցում ձեռք բերած սննդային հավելումները իրեն չեն օգնել նիհարել, դրանց ընդունումից հետո իրեն հոգնած ու թույլ էր զգում, իսկ կշռում էր նույնիսկ ավելի շատ, քան նախկինում:
«Իրականում սա իսկական պլացեբո է: HCG-ն նյութ է, որի շնորհիվ հղիության թեստը դրական արդյունք է ցույց տալիս (թեստն արձագանքում է մեզի մեջ այդ հորմոնի առկայությանը)», - ասել է պրոֆեսոր Դիքսոնը:
Մասնագետի խոսքով՝ սնունդի հետ այս նյութի օգտագործումը ոչ մի կերպ չի կարող նպաստել նիհարելուն: Այդ դեպքում, ինչո՞ւ են որոշ կանայք նիհարում դրա պարունակությամբ հավելումներ ընդունելով: Ամեն ինչ շատ պարզ է. նրանք այդ հավելումները համադրել են ցածրկալորիական դիետաների հետ, ինչն էլ նպաստել է նիհարելուն: Ճիշտ է, կարճ ժամանակ անց դիետաների շնորհիվ կորցրած կիլոգրամները վերադառնում են:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր