Անցյալ տարվա ամենավտանգավոր 5 դիետաները. մի՛ կրկնեք դրանք 2017-ին

Դիետաները, որոնց մասին կխոսենք, լավագույն դեպքում պարզապես անօգուտ են, վատագույն դեպքում՝ վտանգավոր են առողջության եւ նույնիսկ կյանքի համար: Դրանք շատ տարածված էին 2016 թվականին, սակայն մասնագետները խորհուրդ են տալիս խուսափել դրանցից այս տարի եւ ընդհանրապես:

Կիտրոնային դետոքս

Դիետոլոգ Էդ Զիմնին խորհուրդ է տալիս խուսափել, այսպես կոչված, կիտրոնա-պղպեղային ըմպելիքով դետոքսից: Նման «կիտրոնային դիետան» ենթադրում է 10-օրյա կուրս, որի ընթացքում հարկավոր է սնվել միայն ջրից, կիտրոնի հյութից, թխկենու օշարակից եւ քայան պղպեղից կազմված հյութ խմել:

Որոշ հայտնիներ ակտիվորեն գովազդում էին այս դիետան, սակայն բժիշկները պնդում են. դետոքսն ընդամենը առասպել է: կիտրոնային դիետայի բաղադրիչներն առանձին-առանձին, ինչպես նաեւ միասին չեն կարող «մաքրել» օրգանիզմը: Իրականում օրգանիզմը մաքրման կարիք չունի:

Լուսնային դիետա

Լուսնային դիետան, որի համաձայն՝ հարկավոր է լիալուսնի կամ նորալուսնի շրջանում ոչինչ չուտել՝ օրգանիզմն ավելորդ ջրերից եւ ճարպերից մաքրելու համար, նույնիսկ անիմաստ է: Մասնագետների հավաստմամբ՝ նման դիետայի արդյունավետությունը որեւէ գիտական հիմնավորում եւ ապացույց չունի:

Մանկական սննդով դիետա

Եվս մեկ սննդակարգ, որը բժիշկները չեն ընդունում, մանկական սննդով դիետան է, որը կազմել է Հոլիվուդի հայտնի ֆիթնես-մարզիչ Թրեյսի Անդերսոնը: Նա հայտարարել է, որ մանկական սնունդն օգտակար է, քանի որ արհեստական ներկանյութեր եւ կոնսերվանտներ չի պարունակում, ինչպես նաեւ հնարավորություն է ընձեռում վարժվել փոքր չափաբաժինների:

Սակայն դիետոլոգ Էլիս Լեւայնը նշել է, որ այն մարդուն զրկում է սնունդը ծամելու անհրաժեշտությունից, ինչը կարող է բացասաբար անդրադառնալ ծնոտային ապարատի եւ մարսողական համակարգի վրա:

Բացի այդ, մանկական սնունդը չի կարող հասուն օրգանիզմին անհրաժեշտ քանակությամբ մանրաթելեր, սպիտակուցներ եւ ճարպեր փոխանցել:

Բանջարեղենային դիետա

Բժիշկները վնասակար են համարում նաեւ կաղամբապուրով դիետան, երբ մեկ շաբաթ շարունակ հարկավոր է միայն ցածր կալորիականությամբ բանջարեղենային ապուր ուտել: Այն չափազանց քիչ քանակությամբ կալորիաներ է պարունակում, ինչի արդյունքում նյութափոխանակությունը դանդաղում է, իսկ օրգանիզմում կարող է կենսական նշանակության սպիտակուցների եւ ճարպաթթուների պակաս առաջանալ: Փոխարենն ավելի արդյունավետ է բանջարեղենի եւ անյուղ մսի կամ ձկան համադրությունը:

Հյութային դիետա

Վատագույն դիետաների ցանկում ներառվել է նաեւ, այսպես կոչված, հյութային դիետան, որը ենթադրում է բացառապես թարմ քամած մրգերից եւ բանջարեղենից հյութերի օգտագործում: Քալիֆորնիական համալսարանի սպորտային սննդակարգի հարցերի մասնագետ Լիզ Էփլգեյթի խոսքով՝ հյութային դիետան օրգանիզմը զրկում է կյանքի համար անհրաժեշտ նյութերից, որոնք ապահովում է նորմալ սննդակարգը: Դա հանգեցնում է դիետայի ընթացքում նյութափոխանակության դանդաղեցման եւ նորմալ սննդակարգի վերադառնալուց հետո կորցրած կիլոգրամների արագ վերականգնման: Բացի այդ՝ հյութային դիետան վնասակար է ատամների համար:

Հետևեք NEWS.am Medicine-ին Facebook-ում և Twitter-ում