Ինչպե՞ս ազատվել ձմեռային դեպրեսիայից եւ լավացնել տրամադրությունը

Հայերից շատերն այս ձմեռ երկարատեւ ցուրտ եղանակի եւ արեւի լույսի պակասի պատճառով ճնշված եւ նյարդային են դառնում, նրանց տրամադրությունը վատանում է, իսկ գործելու մոտիվացիան կորում է։ NEWS.am Medicine–ի հետ զրույցում հոգեբան Միհրդատ Մադաթյանը նշեց, որ ձմռանը յուրատիպ դեպրեսիա է նկատվում կենդանի արարածների մեծ մասի մոտ եւ բնության մեջ առհասարակ։ Ծառերը կորցնում են տերեւներն ու գույները, որոշ կենդանիներ քուն են մտնում, մյուսները պակաս ակտիվ են դառնում։ Մարդը՝ որպես բնության մաս, նույնպես այսպես կոչված «ձմեռային դեպրեսիայի» է բախվում հատկապես հյուսիսային երկրներում, որտեղ արեւի լույսը շատ քիչ է։

Ինչպես կարելի է հաղթահարել «ձմեռային դեպրեսիայի» նշաններն ու բարելավել տրամադրությունը։ Հոգեբանը մի քանի խորհուրդ է տալիս

Սպորտով զբաղվեք

Սպորտով զբաղվելն օգնում է թուլանալ եւ լավացնում է տրամադրությունը, այդ պատճառով, եթե Դուք Ձեզ վատ եք զգում ձմռանը, սկսեք սպորտով զբաղվել։ Մասնագետը նշեց, որ ցանկացած սպորտ հարմար է այդ գործի համար, բայց հատկապես օգտակար է լողը։ Ի տարբերություն շատ այլ մարզաձեւերի՝ լողն ապահովում է ոչ միայն ֆիզիկական ակտիվություն, այլ նաեւ ջրի հետ «շփում», որն իր հերթին հանգստացնում է նյարդերն ու մկանները։

Զինվեք լավատեսությամբ

Մինչեւ ձմռան ավարտն այդքան էլ շատ չի մնացել, եւ կարելի է զինվել համբերությամբ եւ լավատեսությամբ ու պլաններ կազմել գարնան եւ անգամ ամռան համար։ Հոգեբանը խորհուրդ է տալիս ցանկության դեպքում նայել անցյալ տարվա լուսանկարները եւ մտածել, թե ինչպես եւ որտեղ կուզենայիք անցկացնել այս ամառը։ Տաքության եւ ամռան մասին մտքերը կօգնեն ավելի հեշտ տանել ձմռան ցուրտը։

Լուսային թերապիա

Որոշ երկրներում «ձմեռային դեպրեսիան» բուժում են հատուկ լամպերի լուսային թերապիայով, որոնք օրգանիզմն ընկալում է որպես արեւի լույս։ Բացի այդ, վատ տրամադրությունն օգնում է հաղթահարել նաեւ  համեղ ուտելիքը։

Հետևեք NEWS.am Medicine-ին Facebook-ում և Twitter-ում