«Իզմիրլյան» ԲԿ-ի ԼՕՌ բաժանմունքում կատարում են էնդոսկոպիկ վիրահատություններ (ֆոտո)

«Իզմիրլյան» բժշկական կենտրոնում կոկորդի եւ քթի վիրահատություններ են կատարում քիչ ինվազիվ էնդոսկոպիկ մեթոդով, ինչը թույլ է տալիս խուսափել բաց վիրահատությունների տրավմատիկ հետեւանքներից: « Իզմիրլյան» ԲԿ-ի  քիթ-կոկորդ-ականջաբան Կարեն Սոկոլյանը NEWS.am Medicine-ի հետ զրույցում նշեց, որ կոկորդի եւ քթի հիվանդությունների ախտորոշումը նույնպես էնդոսկոպի միջոցով է կատարվում՝ ճկուն նշտարով ֆիբրոսկոպով, որը հնարավորություն է տալիս զննել քթի խոռոչը, քիթ-ըմպանը եւ կոկորդը:

Բժշկի խոսքով՝ հիվանդները ԼՕՌ մասնագետներին են դիմում հիմնականում քթային դժվարաշնչության, կոկորդում եւ ականջում ցավերի, ծանրալսության եւ խռպոտության (ձայնալարերի խնդիրներ) դեպքերում:

Քթային դժվարաշնչությունը օտորինոլարինգոլոգիայում բոլոր խնդիրներից առավել տարածվածն է եւ կարող է առաջանալ մի շարք գործոնների հետեւանքով՝ միջնապատի ծռվածության, խեցիների գերաճի, հարակից խոռոչների հիվանդությունների (բորբոքումներ, պոլիպներ, կիստաներ): Միջնապատի ծռվածությունը, որը նույնպես հաճախ հանդիպող երեւույթ է, կապված է այն բանի հետ, որ գործնականում բոլոր մարդիկ իրենց կյանքի ընթացքում բախվում են դիմային վնասվածքների հետ: Պարզապես միջնապատի ծռվածությունները տարբեր աստիճանի են լինում եւ միշտ չէ, որ վիրահատության կարիք են ունենում:

Կարեն Սոկոլյանը նշեց, որ եթե կա կոնսերվատիվ մեթոդով բուժելու հնարավորություն, ապա հիվանդին այդ եղանակն է առաջարկվում՝ դեղերով մշակում, տարբեր պրոցեդուրաներ: Վիրահատությունները կատարվում են հստակ ցուցումների դեպքում:

«Իզմիրլյան» ԲԿ-ում քթի վիրահատությունների ժամանակ օգտագործվող KARL STORZ ընկերության էնդոսկոպը պորտատիվ է, եւ դա լրացուցիչ առավելություններ է ստեղծում:

Այս էնդոսկոպը եզակի է նաեւ նրանով, որ քթի խոռոչը տարբեր անկյուններից դիտելու հնարավորություն է տալիս: Կարեն Սոկոլյանի կարծիքով՝ մանրադիտակի համեմատությամբ էնդոսկոպի առավելությունն այն է, որ միկրոսկոպի օգնությամբ վիրահատությունը միայն վիրաբույժն է տեսնում, իսկ էնդոսկոպի դեպքում մոնիտորի վրա վիրահատությանը հետեւում են բոլոր մասնակիցները, դա նաեւ շատ հարմար է ուսանողներին սովորեցնելու համար:

Ի պատասխան պրակտիկայից որեւէ հետաքրքիր դեպք հիշելու մասին մեր խնդրանքին՝ բժիշկը պատմեց, որ «Իզմիրլյան» ԲԿ դիմել է  18-ամյա աղջիկ, որը աջ քթանցքով շնչել չէր կարողանում՝ այն նրա մոտ ի ծնե փակ էր: Նրան հետազոտեցին եւ աջ կողմում պնդացած լորձ հայտնաբերեցին, այնպիսի պարկիկ, որը դժվարությամբ արտածծեցին էլեկտրոասպիրատորի միջոցով: Այնուհետեւ ուղղեցին քթի միջնապատը, եւ միայն դրանից հետո հայտնաբերեցին, որ աղջկա մոտ առկա է քթի խոռոչի բնածին թաղանթային ատրեզիա (խոանի ատրեզիա) եւ միջնապատի դեֆորմացիա, որն հաստատվեց «Իզմիրլյան» ԲԿ-ի համակարգչային տոմոգրաֆի միջոցով: Աղջկան վիրահատեցին եւ սիլիկոնային իմպլանտ տեղադրեցին:

Աղջկա մոտ վիրահատությունից մեկ ամիս անց լրիվ վերականգնվել է շնչառությունը եւ նա առողջացած լիարժեք դուրս է գրվել հիվանդանոցից:

Այժմ էնդոսկոպիկ եղանակով բազմաթիվ հիվանդներ են վիրահատվում. մեթոդն արդիական է ու հարմարավետ:

Հետևեք NEWS.am Medicine-ին Facebook-ում և Twitter-ում