Պրեբիոտիկները ոչ միայն քունն են լավացնում, այլեւ օգնում են սթրեսի դեպքում. գիտնականներ

Պրեբիոտիկները օգտակար են ոչ միայն մարսողության համար, այլեւ քունն են լավացնում, նաեւ նվազեցնում են սթրեսի բացասական էֆեկտները: Այս մասին հայտնում են University of Colorado-ի գիտնականները:

Նրանց կատարած հետազոտությամբ պարզվել է, որ սովորական սնունդից բացի պրեբիոտիկներ ստացած առնետների մոտ խորը քնի ժամանակահատվածը, որի ժամանակ օրգանիզմը հանգստանում է ու վերականգնվում, ավելի երկարատեւ է եղել, քան նրանց մոտ, որոնք պրոբիոտիկներ չեն  ստացել:

Ավելին, երբ փորձի ընթացքում կենդանիները սթրես են տարել, պրեբիոտիկներ ստացողների մոտ արագ քնի շրջանները մեծացել են, որն անհրաժեշտ է վերականգնվելու համար:

Գիտնականները նշել են, որ առայժմ չի կարելի խոսել պրեբիոտիկների միանշանակ դրական էֆեկտի մասին, բայց դրանք վնաս չեն պատճառի, հետեւաբար, այնուամենայնիվ, արժե սնունդի մեջ օգտագործել:

Պրեբիոտիկները սննդային մանրաթելեր են, որոնք պարունակվում են որոշ մթերքներում, օրինակ՝ ճարճատուկի, արտիճուկի, հում սխտորի, պրասասոխի եւ սոխի մեջ: Երբ մարդն այս մթերքներն է ուտում, նրա աղիներում բակտերիաները դրանց մեջ պարունակվող մանրաթելերով սնվելու հնարավորություն են ստանում եւ սկսում են ավելի արագ բազմանալ, որը դրական է անդրադառնում աղիների առողջության վրա: Դրանից բացի, պրեբիոտիկների մարսման ընթացքում բակտերիաները նյութեր են արտադրում, որոնք, պրոֆեսոր Մոնիկա Ֆլեշների խոսքով, կարող են դրական ազդել ուղեղի գործունեության վրա:

Հետևեք NEWS.am Medicine-ին Facebook-ում և Twitter-ում