«Էրեբունի» բժշկական կենտրոնում Հայաստանում առաջին անգամ կատարվել է լրացուցիչ երիկամային զարկերակի անեւրիզմի եւ զարկերակաերակային խուղակի էմբոլիզացիա:
Հիվանդի՝ 59 տարեկան Ն. Գ.-ի մոտ երիկամաբջջային ուռուցքի պատճառով հունվարին կատարվել էր երիկամի վերին հատվածի մասնահատում: Նա դուրս էր գրվել բավարար վիճակում: Սակայն 1,5 ամիս հետո տղամարդը մեզի մեջ արյուն էր նկատել, որն աստիճանաբար առատացել էր:
Մարտի 2-ին նա մակրոհեմատուրիայով (մեզի մեջ արյան առկայություն) ընդունվել է «Էրեբունի» ԲԿ, հայտնում է հիվանդանոցի կայքը: Կատարվել է ՀՏ հետազոտություն՝ ներերակային կոնտրաստավորմամբ եւ ախտորոշվել է լրացուցիչ ձախ երիկամային զարկերակի անեւրիզմ (ինչը եւ եղել է արյունահոսության պատճառը):
Գոյություն ունի լրացուցիչ երիկամային զարկերակի անեւրիզմի բուժման 2 մեթոդ՝ բաց վիրահատական եւ էնդովասկուլյար (ներանոթային): Որոշում է ընդունվել կատարել ձախ լրացուցիչ երիկամային զարկերակի, որից սնվել է անեւրիզմը, էնդովասկուլյար օկլյուզիա:
Մարտի 3-ին «Էրեբունի» ԲԿ-ի անգիոգրաֆիայի ծառայության ինտերվենցիոն սրտաբան Արսեն Ծատուրյանը հիվանդ Ն. Գ.-ին տեղական անզգայացմամբ հասանելի աջ ազդրի միջոցով (հիվանդի ընդհանուր ձախ զստային զարկերակը պրոթեզավորվել էր 10 տարի առաջ) կատարել է ձախ երիկամային զարկերակների սելեկտիվ անգիոգրաֆիա, եւ հաստատվել է ՀՏ հետազոտության ախտորոշումը: COOK (ԱՄՆ) ֆիրմայի ներանոթային պարույրի միջոցով կատարվել է լրացուցիչ երիկամային զարկերակի անեւրիզմի էմբոլիզացիա: Ամբողջական էմբոլիզացիան կատարվել է 3 պարույրների օգնությամբ, որից հետո անտեգրադային արյունահոսք չի նկատվել: Հիվանդի մոտ այլեւս չի նկատվել մեզի հետ արյան արտադրում (հեմատուրիա), եւ նա երկրորդ օրը դուրս է գրվել:
Երիկամային զարկերակի անեւրիզմը հազվադեպ պաթոլոգիա է, որը հանդիպում է 0,09 տոկոս դեպքերում, ախտորոշվում է ՀՏ հետազոտությամբ, որը, որպես կանոն, նշանակվում է ռենովասկուլյար հիպերտենզիայի, հեմատուրիայի դեպքում: Բաց վիրահատական միջամտությունները վտանգներ են պարունակում ինչպես ընդհանուր անզգայացման հետ կապված, այնպես էլ բուն վիրահատության: Անեւրիզմների եւ երիկամային զարկերակի զարկերակաերակային խուղակների էնդովասկուլյար, քիչ ինվազիվ բուժումը տվյալ պաթոլոգիայի դեպքում 100 տոկոսով երաշխավորված լուծում է:
Ըստ որում՝ մասնահատումից կամ նույնիսկ երիկամի հեռացումից խուսափելու հնարավորություն է ստեղծվում, նկատվում է վիրահատական փոքր վտանգ եւ հոսպիտալացման կարճ ժամանակահատված, որը համադրվում է ինտերվենցիայի բարձր արդյունավետությամբ:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր