«Էրեբունի» բժշկական կենտրոնի կարդիովիրաբույժները հեռացրել են 70 տարեկան հիվանդի սրտի միկսոման՝ բարորակ ուռուցքը:
Հիվանդը «Էրեբունի» ԲԿ է ընդունվել ապրիլի 4-ին՝ բողոքելով ընդհանուր թուլությունից, ֆիզիկական ծանրաբեռնվածության դեպքում հեւոցից եւ սրտի խփոցից: Էխոսրտագրով ձախ նախասրտում ծավալուն գոյացություն է հայտնաբերվել՝ ոչ հոմոգեն կազմությամբ, հավասար եզրերով, 6x4 սմ չափով, միջնախասրտային միջնորմին լայն կոթունով կպած (ձախ նախասրտի միկսոմա): Գոյացությունը շարժվող էր եւ առաջացնում էր միտրալ փականի մասնակի օբստրուկցիա՝ միտրալ ստենոզի 1,5 քառ.սմ զարգացմամբ:
«Էրեբունի» ԲԿ-ի կարդիովիրաբուժության բաժանմունքի վարիչ, բ.գ.թ. Վահե Գասպարյանի ղեկավարությամբ ապրիլի 11-ին հիվանդը վիրահատվել է: Օգտագործվել է ձախ նախասրտի խոռոչին հասնելու վերին տրանսսեպտալ (SuperiorTransseptalApproach) հասանելիությունը: Խոռոչը մատներով ստուգելիս դիտվել է ուռուցքաձեւ գոյացություն՝ օվալաձեւ պատուհանի հատվածում ֆիքսված: Միջնախասրտային միջնորմի մոտ լայն կոթունի վրա (3 x 3 սմ) ֆիքսացիայի տեղում կատարվել է ուռուցքի հատում առողջ հյուսվածքների սահմաններում՝ մոտ 6 x 4 սմ չափերով ուռուցքի հետագա հեռացմամբ ձախ նախասրտի միասնական հատվածի խոռոչից:
Գոյացության գիստոլոգիական հետազոտությամբ հաստատվել է ֆիբրոմիկսոմայի ախտորոշումը:
Հիվանդը բավարար վիճակով դուրս է գրվել 7-րդ օրը:
Միկսոման բարորակ գոյացություն է, որն ավելի հաճախ տեղակայվում է ձախ նախասրտում: Մեծ չափերի միկսոմաները չափազանց հազվագյուտ երեւույթ են: Այս ուռուցքների վտանգավորությունը ուռուցքի կամ նրա մի հատվածի հնարավոր պոկվելն է՝ էմբոլիայի բարդությունների առաջացմամբ, ինչպես նաեւ սրտի կանգով միտրալ փականի ամբողջական օբստրուկցիայի զարգացմամբ:
Դեռեւս 2005 թվականին «Էրեբունի» ԲԿ-ի կարդիովիրաբուժության բաժանմունքում արդեն նման կարգի վիրահատություն հաջողությամբ կատարվել է: «Էրեբունի» ԲԿ-ի մասնագետների հարուստ փորձը եւ պրոֆեսիոնալիզմը թույլ են տալիս նույնիսկ կլինիկական ծանրագույն դեպքերում արդյունքներ ցույց տալ, որոնք համապատասխանում են համաշխարհային ստանդարտներին:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր