Նախկինում Լոնդոնում իշեմիկ ինսուլտների բուժմամբ զբաղվում էր 31 կլինիկա։ Վերակազմավորման արդյունքում դրանցից մնացին ընդամենը 5-ը։ Այս մասին Հայաստանի Ամերիկյան համալսարանում սեմինարի ժամանակ պատմել է Մեծ Բրիտանիայի Առողջապահության նախկին նախարար, Լոնդոնի Կայսերական քոլեջի պրոֆեսոր, բժշկության և վիրաբուժության մեջ ունեցած ավանդի համար Բրիտանական կայսրության ասպետի կոչում ստացած լորդ Արա Դարզին։
Նրա խոսքով՝ երբ առողջապահական կազմակերպությունների մասնագետները գնահատել են 31 կլինիկայի աշխատանքը, պարզել են, որ միայն 3-ն են համապատասխանում ինսուլտի բուժման լավագույն միջազգային չափանիշներին: Այսպիսով, դժվարին որոշում է կայացվել՝ կլինիկաների վերակազմավորում կատարել: Այս որոշումը շատերի ուշադրությունն է հրավիրել և մեծ աղմուկ բարձրացրել, սակայն ի վերջո իշեմիկ ինսուլտների բուժման 5 կլինիկա է մնացել։
Բուժումն այս կլինիկաներում բարձր մակարդակի վրա է կատարվում, դրանք աշխատում են օրը 24 ժամ, շաբաթը 7 օր։
Կանոնակարգի համաձայն՝ հիվանդներին կոնկրետ ժամանակահատվածում համակարգչային տոմոգրաֆիա են անում, այնուհետ՝ թրոմբը քայքայելու համար հատուկ դեղամիջոց են ներարկում։ Բուժման այս մեթոդը զգալիորեն բարձրացնում է դրա արդյունավետությունը, նվազեցնում մահվան հավանականությունը։
«Եթե Դուք Լոնդոն գնաք, եւ սրտամկանի ինֆարկտ կամ ինսուլտ ստանաք, անկախ նրանից ՝ Ձեր դրամապանակը լիքն է, թե չէ, 3 ժամվա ընթացքում Ձեզ 91 տոկոս հավանականությամբ անգիոպլաստիկա կանեն եւ ստենտ կդնեն, եթե դա սրտի կաթված է։ Իշեմիկ ինսուլտի դեպքում՝ 89 տոկոս հավանականությամբ արագ անհրաժեշտ բուժում կստանաք: Ոչ ոք չի ստուգելու, թե ով եք Դուք, փող ունեք, քանի որ դա արտակարգ դեպք է: Շտապ օգնությունն էլ Ձեզ մասնագիտացված, այլ ոչ թե մոտակա հիվանդանոց կտանի», - ասել է Դարզին:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր