Շաքարը կարող է քաղցկեղի ագրեսիվ տեսակի զարգացման պատճառ դառնալ

Մեծ քանակությամբ շաքարի գործածումը կարող է հանգեցնել չարորակ ուռուցքի ակտիվ աճի։ Նման եզրակացության են հանգել Ֆլամանդիայի բիոտեխնոլոգիաների ինստիտուտի գիտնականները։

Մասնագետները իննամյա լայնածավալ հետազոտություն են իրականացրել, որի ընթացքում կարողացել են պարզել, որ նյութափոխանակության շեղման՝ Վարբուրգի էֆեկտի ու ուռուցքաբանական ակտիվության միջեւ կա կապ։ Ընդ որում, գիտնականները փորձերի ընթացքում օգտագործել են խմորիչ, որի բջիջները պարունակում են նույն սպիտակուցներն, ինչ քաղցկեղային ուռուցքները։

Նշվում է, որ ի տարբերություն առողջ բջիջների՝ քաղցկեղային բջիջները էներգիայի հիմնական մասը վերամշակում են գլյուկոզայի տրոհման հաշվին։ Այս երեւույթը գործարկում է քաղցկեղի զարգացման ու աճի անընդմեջ խթանման ցիկլը։

«Մենք խմորիչի օրինակի վրա դիտարկել ենք, որ ֆրուկտոզո-1․6- դիֆոսֆատի միջոցով ակտիվացել են այն  սպիտակուցները, որոնք խթանում են թե՛ խմորիչի, թե՛ չարորակ ուռուցքների բջիջների բազմացումը»,- նշել է հետազոտության հեղինակներից մեկը՝ պրոֆեսոր Յոհան Թեւելեյնը։

Գիտնականները կարծում են, որ հայտնաբերված կապը կօգնի  ուռուցքաբանական հիվանդների համար անհատական սննդակարգեր կազմելու հարցում։

Գիտնականների հետազոտությունը հրապարակվել է Nature Communications ամսագրում։

Հետևեք NEWS.am Medicine-ին Facebook-ում և Twitter-ում