Մանկաբույժ. Քաղցր յոգուրտներն ու գազավորված ըմպելիքները չարիք են երեխայի համար

Խանութի յոգուրտները, որոնք շատ շաքար (կամ շաքարին փոխարինողներ, որոնք ավելի վատ են) եւ բուրավետիչներ են պարունակում, ոչ մի կերպ չես կարող երեխայի համար օգտակար սնունդ համարել, պնդում է Հիվանդությունների կանխարգելման ու վերահսկման ազգային կենտրոնի իմունականխարգելման բաժնի մանկաբույժ Մարինե Կիրակոսյանը: NEWS.am Medicine-ի թղթակցի հետ զրույցում նա նշել է, որ լավ կլինի այդպիսի յոգուրտները եւ գազավորված ըմպելիքները երեխայի սննդակարգից բացառել:

Մասնագետը նշում է, որ շատերը յոգուրտը առողջարար եւ օգտակար են համարում, սակայն իրականում նրանցում շատ անպիտան քիմիական նյութեր, կոնսերվանտներ ու շաքար է պարունակվում:

«Այսօր մարդիկ սիրում են քննարկել պատվաստանյութի բաղադրությունը, իբր դրանցում կոնսերվանտներ եւ այլ «վնասակար» նյութեր կան: Բայց ոչ ոք չի մտածում, թե որքան կոնսերվանտներ եւ վտանգավոր նյութեր կան պտրաստի յոգուրտներում, որոնք նրանք գրթե ամեն օր գնում են իրենց երեխաների համար: Երեխան ողջ կյանքում պատվաստում ստանում է մի քանի անգամ, իսկ յոգուրտներ՝ համարյա ամեն օր: Այժմ մտածեք, թե նրա համար ո՞րն է ավելի վտանգավոր»,- հարցնում է մասնագետը: Մանկաբույժը խորհուրդ է տալիս յոգուրտի փոխարեն երեխաներին տեղական արտադրության մածուն տալ՝ կտրատված բանջարեղենով ու մուրաբայով:

Ինչ վերաբերում է քաղցրահամ գազավորված ըմպելիքներին, ապա դրանց մեջ ոչ մի օգտակար բան չկա, նշում է մասնագետը: Դրանք միայն վնասակար են, այդ պատճառով անհրաժեշտ է երեխայի սննդակարգից ի սպառ բացառել այն: Դրանց փոխարեն երեխան կարող է խմել թարմ քամված հյութ, կոմպոտ, որոնք պատրաստված կլինեն թարմ կամ չորացված մրգերից: Որպեսզի կոմպոտը պհպանի մրգի օգտակար հատկությունները, խորհուրդ չի տրվում այն երկար եռացնել: Կոմպոտը կարելի է եռացնել ու թողնել, որ այն թրմվի:

Երեխայի սննդակարգից բացառել նաեւ այլ քաղցրավենիքները, ինչպիսիք են թխվածքաբլիթները, շոկոլադը, մանկաբույժի խոսքով, սխալ է եւ նաեւ անհնար: Սակայն պետք է քաղցրը չափավոր ուտել: Երեխային քաղցրավենիք տալ հիմնական կերակրումների միջեւ սխալ է, քանի որ քաղցրավենիքը կփակի նրա ախորժակը եւ նա չի ստանա խորհուրդ տրվող չափաբաժնով բանջարեղեն, հատիկավորներ եւ միս

Հետևեք NEWS.am Medicine-ին Facebook-ում և Twitter-ում