Ատամի պրոթեզները թերսնուցման են բերում

Ատամի պրոթեզները թերսնուցման կարող են բերել, պնդում են Լոնդոնի Թագավորական քոլեջի հետազոտողները:

Նրանց կարծիքով՝ ներդրված ատամնաշարերը խանգարում են ծամել առողջ սնունդը՝ միսը, ընկուզեղենը, բանջարեղենն ու միրգը: Խնդիրներ են առաջանում նաեւ նրանց մոտ, ովքեր կորցրել են ատամները, բայց պրոթեզ չեն կրում: Երկու դեպքում էլ թերսնուցման պատճառով թուլանում են մկանները, ոսկորներն ու հոդերը, որը կարող է վնասվածքների պատճառ դառնալ:

«Այսօրվա դրությամբ վնասվածքներ ստանալու դեմ ողջ պայքարը կապված է դիետաների ու սնվելու նկատմամբ մարդկանց գրագիտության հետ, իսկ ծերության ժամանակ առողջության վրա ատամների ազդեցությունը հերքվում է»,- նկատել է գիտական աշխատանքի հեղինակներից մեկը՝ Վաել Սաբախը:

Հետազոտությանը մասնակցել է ավելի քան 1800 տարեց մարդ: Նրանց երեք խմբի են բաժանել: Առաջին խմբի մասնակիցներն ունեցել են ավելի քան 20 ատամ, երկրորդ խմբի անդամներն ավելի քիչ ատամ են ունեցել եւ պրոթեզ են կրել, երրորդ խմբի անդամները նույնպես 20-ից քիչ ատամ են ունեցել եւ ոչինչ չեն կրել:

Գիտնականները հաշվարկել են Մարմնի զանգվածի ինդեքսը եւ վերլուծել հետազոտության մասնակիցների ատամների, հյուսվածքների եւ ոսկորների վիճակը: Արդյունքները ցույց են տվել, որ արհեստական ատամների առկայությունը 32 տոկոսով բարձրացնում է թերսնուցման կամ «դյուրաբեկության»  հավանականությունը:

Հետևեք NEWS.am Medicine-ին Facebook-ում և Twitter-ում