Առողջության համար վտանգավոր է ոչ միայն ալկոհոլի ավելցուկային քանակությունը, այլեւ դրա սխալ համադրումը սննդամթերքի եւ դեղերի հետ: Ալկոհոլն ինչի՞ հետ չի կարելի համադրել:
Հակաբիոտիկներ
Մասնագետների խոսքով՝ սպիրտայինի եւ հակաբիոտիկների համադրությունը չափազանց անցանկալի է: Բանն այն է, որ ալկոհոլը նվազեցնում է հակաբիոտիկների արդյունավետությունը, նաեւ հարված է հասցնում լյարդին, որը հակաբիոտիկների ընդունման հետեւանքով առանց այն էլ ուժեղացված ռեժիմում է աշխատում:
Անալգետիկներ
Սպիրտային խմիչքները չարժի համադրել նաեւ անալգետիկների՝ ցավազրկող դեղերի հետ: Այս կանոնը խախտելու դեպքում կարող եք առաջացնել լյարդի ծանր ախտահարում:
Հանգստաբերներ
Ցանկալի չէ ալկոհոլը համադրել հանգստաբերների եւ քնաբերների հետ. նման համակցությունը կարող է շարքից հանել կենտոնական նյարդային համակարգը: Նման խանգարման հետեւանքը ուղեղում շնչառական կենտրոնի դիսֆունկցիան է, որը կարող է բերել շնչարգելության եւ սրտի կանգի:
Սրտի դեղեր
Ալկոհոլային խմիչքները չպետք է համադրել նաեւ սիրտ-անոթային համակարգի հիվանդությունների դեպքում նշանակված դեղերի հետ: Հակառակ դեպքում հնարավոր է ճնշման կտրուկ անկում հրահրել՝ այս պրոցեսի հետ կապված բացասական բոլոր հանգամանքներով (սրտխառնոց, ուշաթափություն, երիկամային անբավարարություն):
Էներգետիկ ըմպելիքներ
Ճնշման կտրուկ տատանումներ կարող են գրանցվել այն դեպքերում, երբ ալկոհոլը միախառնվում է էներգետիկ ըմպելիքներին: Նման համադրության առաջացրած այլ տհաճ հետեւանքներից են՝ գլխուղեղի անոթների սպազմները, ջղաձգումները, լյարդի ախտահարումը:
Քաղցր եւ յուղոտ կերակուր
Մասնագետները խորհուրդ չեն տալիս ալկոհոլն օգտագործել քաղցր կամ յուղոտ կերակուրի հետ. քաղցրի (նույնիսկ մրգերի) հետ համադրելու դեպքում ալկոհոլն օրգանիզմի կողմից ավելի դանդաղ է յուրացվում, ինչն ուժգնացնում է նրա տոքսիկ ազդեցությունը, հատկապես լյարդի վրա: Նույն պատճառով խորհուրդ չի տրվում ալկոհոլային խմիչքից հետո յուղոտ սնունդ ուտել:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր