Մրգահյութերն ատամների համար վտանգավոր են

Մրգային թեյերը եւ ըմպելիքները գաղտնի վտանգներ են պարունակում, պնդում են Լոնդոնի Թագավորական քոլեջի հետազոտողները. նրանք հայտնաբերել են, որ «թթվաշ» ըմպելիքների կանոնավոր օգտագործումը 11 անգամ մեծացնում է ատամի էմալի էրոզիայի հավանականությունը:

«Թթու ըմպելիքները հիմա նորաձեւության գագաթնակետին են,- ասում է հետազոտության առաջատար հեղինակ, բժիշկ Սաոիրս Օ՛Թուլը,- մարդկանցից շատերը դրանք խմում են ծարավը հագեցնելու համար, իսկ ինչ-որ մեկը համոզված է, որ առավոտյան սոված ժամանակ մեկ գավաթ կոճապղպեղի, հատապտղի կամ կիտրոնի թեյը օգնում է իմունիտետի ամրապնդմանը: Ցավոք, ստիպված ենք նրանց հիասթափեցնել»:

Օ՛Թուլը եւ նրա գործընկերները մանրամասն ուսումնասիրել են վերջերս կատարված հետազոտության արդյունքները, որն իրականացվել է Լոնդոնի Գայի հիվանդանոցում: Հետազոտության ընթացքում համեմատվել է սաստիկ վնասված ատամներով 300 մարդու սնունդը, եւս 300 մարդու, որոնք համանման խնդիրներից չեն բողոքել:

Պարզվել է, որ բնական մրգաթթուները էմալի տեր շփվելով՝ սկսում են այն քայքայել, ըստ որում՝ դա ավելի արագ է տեղի ունենում տաքացնելիս: Բանն այն է, որ տաքությունը մեծացնում է կալցիումի ֆոսֆատի հետ կիտրոնաթթվի քիմիական փոխազդեցության արագությունը՝ էմալն ավելի ենթակա դարձնելով վնասվելուն, այսինքն՝ տաք ըմպելիքը ատամներին ավելի մեծ վնաս է հասցնում, քան սառը: Ապացուցվել է նաեւ, որ նրանք, ովքեր նախընտրում են թեյը դանդաղ խմել՝ յուրաքանչյուր կումը վայելելով, ավելի մեծ վտանգի են ենթարկվում, ինչը նշանակում է, որ ատամների էրոզիան կարելի է կանխել՝ ըմպելիքը մեծ արագությամբ խմելով: Հետաքրքիր է, որ առանց շաքարի թեյը նույնքան վնասակար է, որքան քաղցրը:

Ավելին՝ ատամնաբույժները նաեւ նախազգուշացնում են ատամների վրա այժմ մոդայիկ մրգային ֆրեշների եւ չիփսերի անբարենպաստ ազդեցության մասին՝ դրանց մեջ նունպես մեծ քանակությամբ կիտրոնաթթու է պարունակվում:

Հետևեք NEWS.am Medicine-ին Facebook-ում և Twitter-ում