Տապակած միսը մեծացնո՞ւմ է 2-րդ տիպի դիաբետի զարգացման վտանգը

Մսի պատրաստման որոշ եղանակներ ավելի վտանգավոր են մյուսներից ոչ միայն այն պատճառով, որ մեծացնում են քաղցկեղի զարգացման հավանականությունը, այլ նաեւ այն պատճառով, որ կարող են կապված լինել 2-րդ տիպի դիաբետի հետ: Այսպես՝ բաց կրակի վրա կամ «բարձրջերմաստիճանային» այլ մեթոդներով (գրիլ կամ բաց տապակի մեջ) մսի եւ թռչնի պատրաստումը մեծացնում է 2-րդ տիպի դիաբետի զարգացման հավանականությունը: Այս մասին նշված է Diabetes Care ամսագրում հրապարակված նոր հետազոտության մեջ:

Հետազոտության հեղինակ Harvard T.H. Chan School of Public Health-ի գիտնականները հետազոտել են մսի պատրաստման բարձրջերմաաստիճանային եղանակների եւ 2-րդ տիպի դիաբետի միջեւ փոխկապվածությունը: Հետազոտության մեջ ներառվել են  Nurses' Health Study-ի հետազոտության 52 752 կանանց տվյալները, Nurses' Health Study II-ի հետազոտության 60 809 կանանց, ինչպես նաեւ Health Professionals Follow-Up Study-ի հետազոտության 24 679 տղամարդկանց տվյալները:

Գրանցվել է 2-րդ տիպի դիաբետի զարգացման 7 895 դեպք: Մի քանի մեծությունների շտկումից հետո, ինչպիսին է մարմնի զանգվածի բազային ինդեքսը եւ կարմիր մսի, թռչնամսի ու ձկան ընդհանուր օգտագործումը, պարզվել է, որ բարձրջերմաստիճանային եղանակներով պատրաստված մսի, հավի եւ ձկան օգտագործման հաճախակիությունը կապված է 2-րդ տիպի դիաբետի զարգացման հավանականության մեծացման հետ:

Այս հիվանդության զարգացման հավանականության մեծացումը կազմել է 28 տոկոս բաց կրակի օգտագործման եւ/կամ բարձրջերմաստիճանային մշակման դեպքում, որը ամսական 15 անգամից ավելի հաճախ է օգտագործվել՝ նույն մեթոդներով պատրաստման համեմատությամբ, երբ օգտագործվել է ամսական 4 անգամից պակաս: Համահարաբերակցությունը զգալի է եղել նաեւ այն դեպքերում, երբ թռչնամիսն ու կարմիր միսն առանձին-առանձին են գնահատվել:

Հետազոտության հեղինակներն ընդգծում են, որ եթե անգամ ձեր ճաշացանկում նախընտրում եք ոչ թե կարմիր միսը, այլ հավի կամ ձկան դիետիկ միսը, ձեզ մոտ, միեւնույն է, նկատելիորեն մեծանում է 2-րդ տիպի դիաբետի զարգացման հավանականությունը, եթե նախընտրում եք դրանք  պատրաստել գրիլի, բարբեքյուի կամ բաց տապակի միջոցով: Այդպիսով, այս վտանգը կախված է ոչ այնքան մթերքի տեսակից, որքան այն պատրաստելու եղանակից:

Հետևեք NEWS.am Medicine-ին Facebook-ում և Twitter-ում