Սանկտ Պետերբուրգի Պաստերի անվան համաճարակաբանության եւ մանրէաբանության գիտահետազոտկան ինստիտուտի տնօրեն, Պավլովի անվան Սանկտ Պետերբուրգի առաջին պետական բժշկական համալսարանի մանրէաբանության ամբիոնի վարիչ Արեգ Թոթոլյանը ԵՊԲՀ-ում «Իմունոախտորոշման եւ իմունոթերապիայի արդի հիմնախնդիրները» համաժողովի ժամանակ ցիտոկինները խաչքարերի հետ է համեմատել: Նա նշել է, որ ինչպես նույնական խաչքարեր գոյություն չունեն, այնպես էլ նույնական ցիտոկիններ, իսկ գիտնականների խնդիրն է գտնել այն ցիտոկինը, որն ավելի ինֆորմատիվ կլինի:
NEWS.am Medicine-ի թղթակցի հետ զրոյցում Արեգ Թոթոլյանը նշել է, որ ցիտոկինները մոլեկուլներ են, որոնք արտադրվում են օրգանիզմի տարբեր բջիջների կողմից, բացառությամբ էրիթրոցիտների:
«Դրանք գոյություն ունեն նրա համար, որպեսզի օրգանիզմի տարբեր բջիջները խոսեն միմյանց հետ, դա նրանց շփման միջոցն է: Դրանք մասնակցում են մարդու օրգանիզմի բոլոր գործընթացներին՝ ֆիզիոլոգիականից մինչեւ պաթոֆիզիոլոգիական, այսինքն երբ արդեն կան մեխանիզմներ, որոնք հանգեցնում են այս կամ այն հիվանդությանը», – ասել է նա:
Իմունաբանի խոսքով՝ յուրաքանչյուր խաչքար յուրօրինակ է, նույնն էլ կարելի է ցիտոկինների մասին ասել: Ավելին՝ ցիտոկինի նույն մոլեկուլը կարող է տարածական տարբեր ձեւերով գոյություն ունենալ եւ դա նույնպես բնորոշում է նրանց յուրօրինակության շատ բարձր աստիճանը:
«Տիրապետելով այս կամ այն հիվանդության պաթոգենեզում ցիտոկինների մասնացկացության մասին տեղեկատվությանը, մենք կարոսղ ենք ախտորոշման նոր կենսամարկերներ մշակել: Բացի այդ այս տեղեկատվությունը հնարավորություն է տալիս որոշել կանխատեսող մարկերներն արդեն թերապիայի հետ կապելով», -ասել է նա, հավելելով, որ իմունաթերապիայի ժամանակակից մեթոդները բավական թանկ են: Բացի այդ իմունաթերապիան երկսայր զենք է, եթե այս կամ այն դեղը նշանակեն ցուցումներին անհամապատասխան, այն կարող է վնասել:
«Ուստի իմունաթերապիայի հետ կապված կանխատեսող կենսամարկերների որոնումը բավական կարեւոր խնդիր է», - ասել է նա:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր