• Latest news

Առաջին անգամ միավորվում են բոլոր ռեսուրսները՝ քաղցկեղով հիվանդ երեխաների բուժման համար. ուռուցքաբան

23 մայիսի, 2018  22:39

Հայաստանում առաջին անգամ միավորվում են բոլոր ուժերն ու ռեսուրսները՝ քաղցկեղով հիվանդ երեխաների բուժման համար: Այս մասին NEWS.am Medicine-ի թղթակցին ասաց մանկական ուռուցքաբան, արյունաբան Գեւորգ Թամամյանը: Նա ընդգրկված է ՀՀ վարչապետի կնոջ՝ Աննա Հակոբյանի նախաձեռնությամբ ստեղծված աշխատանքային խմբում, որը պետք է զբաղվի մանկական ուռուցքաբանության և արյունաբանության ոլորտի զարգացմամբ:

Ըստ հանրապետության կլինիկաներից հավաքագրված տվյալների՝ Հայաստանում տարեկան շուրջ 75 երեխայի մոտ ուռուցքային հիվանդություն է ախտորոշվում: Նրանց բուժմանն օգնելու համար մոտ տասնյակ բարեգործական հիմնադրամներ են գործում, տարբեր հանգանակություններ կազմակերպվում:

«Այդ երեխաները միշտ էլ օգնություն ստացել են: Բայց քանի որ մանկական քաղցկեղի բուժումը մեծ ֆինանսական միջոցներ է պահանջում, վարչապետի տիկնոջ կողմից ընդգծվեց այս հարցի կարևորությունը և ռեսուրսները միավորելու անհրաժեշտությունը: Իսկ ձևաչափը, որ մինչ այս գործող հիմնադրամները միավորվեն մեկ գաղափարի շուրջ՝ պետական հովանու ներքո, առաջին անգամ է լինելու»,- նշեց Գևորգ Թամամյանը: Ըստ բժշկի՝ աշխատանքային խմբի հայտարարությունից հետո ընդամենը մի քանի օրվա ընթացքում արդեն շատացել են արձագանքների ու օգնել ցանկացողների թիվը:

Հիմնադրամների և անհատ մարդկանց համատեղ աշխատանքի հարթակը կդառնա նոր ստեղծվող հիմնադրամը: Այն կազմված կլինի մյուս գործող հիմնադրամների ներկայացուցիչներից: Գեւորգ Թամամյանը մեկնաբանեց, որ սա չի նշանակում, թե այդ հիմնադրամները պետք է մաս դառնան նորին, դրանք իրենց միջոցներով կշարունակեն գործել ինքնուրույն, իսկ թե ինչպես պետք է գործի նոր հիմնադրամը, դեռեւս քննարկման փուլում է:

«Մանկական ուռուցքաբանությունն ու արյունաբանությունը մեր բժշկության և առողջապահության ամենակարևոր խնդիրներից են: Ստեղծված աշխատանքային խումբն այժմ մշակում է ռազմավարությունը: Ոլորտի զարգացման ճանապարհային քարտեզը կներկայացնենք շուտով: Մեր գերագույն նպատակն է, որ քաղցկեղով հիվանդ յուրաքանչյուր երեխա ստանա անհրաժեշտ բուժօգնություն»,- ասաց մանկական ուռուցքաբանը:

Նշենք, որ մանկական ուռուցքաբաններից ու հիմնադրամներից կազմված աշխատանքային խումբը մեկ շաբաթվա ընթացքում երկրորդ հանդիպումն է անցկացրել Աննա Հակոբյանի գլխավորությամբ:

Հետևեք NEWS.am Medicine-ին Facebook-ում և Twitter-ում


 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է