Գիտնականները գտել են Պարկինսոնի հիվանդության հետ կապակցված գենը

Անցյալում համարվում էր, որ LRRK2 գենը կա Պարկինսոնի հիվանդության տառապող մարդկանց միայն 3-4 տոկոսի մոտ։ Իսկ հիմա Փիթսբուրգի համալսարանի գիտնականները պարզել են, որ այդ գենը կարող է մեծ նշանակություն ունենալ պարկինսոնիզմով տառապող հիվանդների մեծ մասի համար։

Նախկինում պարզվել էր, որ LRRK2 գենում մուտացիաները կարող են հանգեցնել սպիտակուցի չափազանց մեծ ակտիվացման, որը սադրում է պարկիսոնիզմի զարգացումը որոշ մարդկանց մոտ։ Ու երբեմն էլ խոսքը հիվանդության ժառանգական ձեւի մասին է։ Գիտնականները ստեղծել են ֆլուրեսցենտային մոլեկուլյար տարբերանիշ այդ գենի համար։ Երբ տարբերանիշը միացել է LRRK2-ին, ու սպիտակուցն ակտիվ էր, այն սկսում էր լուսարձակել։ Դա թույլ էր տալիս հասկանալ, թե ուղեղի հատկապես որ բջիջներում է այդ գենը ակտիվ։

Գիտնականները հետազոտել են պարկիսոնիզմով տառապող ու LRRK2–ում մուտացիաներ չունեցող հիվանդների ու առողջ մարդկանց գլխուղեղի հյուսվածքները։ Պարզվել է, որ պարկիսոնիզմով տառապող մարդկանց դեպքում դոֆամինային նեյրոններում (որոնք հաճախ են տուժում այդ հիվանդությունից) LRRK2 ցույց էր տալիս բարձր ակտիվություն։

Մասնագետների կարծիքով LRRK2-ի բարձր ակտիվությունը կարող է կարեւոր լինել ոչ միայն հատուկ մուտացիա ունեցող հիվանդների համար։ Ընդ որում արտաքին գործոնները՝ օրինակ օքսիդային սթրեսն ու թույները կարող են ակտիվացնել LRRK2-ն, սադրելով ուղեղում Լեւի մարմնիկների կուտակում (Պարկինսոնի հիվանդության նշան)։

Հետևեք NEWS.am Medicine-ին Facebook-ում և Twitter-ում