Բժիշկ Արա Վարդանյանը հայրենիք է վերադարձել լապարոսկոպիկ վիրաբուժությունը կատարելագործելու նպատակով

Արա Վարդանյանը հայրենադարձության ճանապարհը բռնած առաջին բժիշկներից է: Երկար տարիներ աշխատել է Մոսկվայում, սակայն որոշել, որ  ժամանակն է սեփական երկրում գիտելիքներն ու փորձը ներդնել:  Հայտնի վիրաբույժը հիմա ղեկավարում է «Էրեբունի» ԲԿ-ի ընդհանուր եւ կրծքային վիրաբուժության բաժանմունքը, իսկ ընտանիքը՝ հարմարվում երեւանյան կյանքին: Բուժկենտրոնում Արա Վարդանյանը  հնարավորություն է ստացել բոլորովին այլ մակարդակի հասցնել լապարոսկոպիկ վիրահատությունները:

Հիվանդն անզգայացված է, վիրաբույժը ձեռքն է վերցնում աշխարհի լավագույն հիվանդանոցներում կիրառվող  ժամանակակից լապարոսկոպը: Վիրահատությունը, որը Հայաստանում մինչեւ հիմա արվել է  բաց եղանակով, Արա Վարդանյանը  կատարում է ընդամենը մի փոքր կտրվածքով:  15 տարի Մոսկվայի լավագույն կլինիկաներում աշխատելուց հետո բժիշկը  հայրենիք է  վերադարձել: Հայրենադարձության ճամփան սկսել էր  «Էրեբունի» ԲԿ նամակ ուղարկելով. պատասխանը չէր ուշացել: Զանգել էին ու փոխանցել. հիվանդանոցի ղեկավարությունն իր հետ խոսելու ցանկություն ունի: Արա Վարդանյանը լույսը բացվելուն չէր սպասել. հենց նույն գիշեր էր ինքնաթիռի տոմսը գնել:

-Ես  շատ տրամադրված էի: Ծնողներս,  քույրս բժիշկներ են ու «Էրեբունի» բժշկական կենտրոնը բոլորս  լավ գիտեինք: Բազմապրոֆիլ հիվանդանոց է, մեծ հզորությամբ,  որտեղ, ես, իսկապես կարող եմ օգտագործել իմ հնարավորությունները,-ասում է վիրաբույժը: 

 Հայրենք վերադառնալու՝ տարիների ցանկությունը իրականություն դարձավ միանգամից ու «Էրեբունի» բժշկական կենտրոն մտավ արդեն որպես Ընդհանուր եւ կրծքային վիրաբուժության բաժանմունքի վարիչ: Հիմա հարազատ է դարձել  ամեն ինչ: Իր գործընկեր բժիշկների պրոֆեսիոնալիզմով ամեն օր է հիանում: Կատակում է՝ Մոսկվայի համեմատ միայն մեկ տարբերություն կա.  այստեղ բույժույրերը վիրահատարանում  բժշկին դժկամությամբ չեն օգնում:  Ցանկությունը մեկն է. այս հիվանդանոցում մեկ այլ մակարդակի հասցնել լապարոսկոպիկ վիրաբուժությունը: Դրա համար արդեն բոլոր պայմանները ստեղծված են՝ սկսած ժամանակակից սարքավորումներից մինչեւ վիրահատարանի պայմաններ: 

-Բժիշկները բոլորը հակված են զարգացնել իրենց գիտելիքները, հատկապես մեր երիտասարդ բժիշկնեը շատ մեծ պոտենցիալ ունեն: Կես տարվա մեջ  լապարասկոպիկ ու տրադիցիոն վիրաբուժության մեջ  մենք կհասնենք բարձր մակարդակի: Ամեն ինչ կանենք, որպեսզի ապահովենք որակյալ ու  ժամանակակից բուժօգնություն՝ ութսուն տոկոսի հասցնելով լապարոսկոպիկ վիրահատությունները: Երեք-չորս ամսում մեր բաժանմունքում  կձգտենք հասնել  այդ թվերին՝ ավելի հեշտ, մատչելի ու ժամանակակաից մեթոդներով բուժօգնություն ցուցաբերելով մեր ազգաբնակչությանը ,-ասում է ընդհանուր եւ կրծքային վիրաբուժության բաժանմունքի վարիչը:

Հիմա, հետ հայացք գցելով, խոստովանում է՝  Մոսկվայում աշխատելուց հետո միակ վայրը, որտեղ կարող էր եւ պետք է աշխատեր՝ հենց այս հիվանդանոցն է:

-Ինձ այլ առաջարկներ եւս եղան, սակայն ես որոշեցի ընտրել «Էրեբունին»: Հիվանդանոցի ղեկավարությունը՝ պարոն Քուշկյանն ու Մանուկյանն ինձ հավատացին:  Ես որոշեցի, որ  կաշխատեմ միայն իրենց ղեկավարությամբ,-ասում է հայտնի վիրաբույժը: 

Լապարոսկոպիկ  եղանակով կատարվող վիրահատությունների թիվը բժիշկը նախատեսում է օր օրի ավելացնել: Այստեղ նրա գլխավորությամբ կկատարվեն բոլոր այն վիահատությունները, որոնց դեպքում աշխարհն արդեն հրաժարվել է որովայնը բացելու ճանապարհից, սակայն մեր երկրում դեռեւս ընդունված չեն: Ընդամենը 3 փոքր կտրվածքները թույլ կտան հիվանդին ամենաբարդ դեպքերից հետո առողջությունը վերականգնել  կարճ ժամանակում:

Հետևեք NEWS.am Medicine-ին Facebook-ում և Twitter-ում