• Latest news

Ինչո՞ւ է մահացել 22-ամյա կինը. Ամուսինը եւ բժիշկները տեղի ունեցածի տարբեր վարկածներ ունեն

18 սեպտեմբերի, 2018  21:31

Սեպտեմբերի 3-ին Երեւանի «Սուրբ Գրիգոր Լուսավորիչ» բժշկական կենտրոնում մահացել է ՌԴ քաղաքացի, Եկատերինբուրգի բնակիչ, 22-ամյա Վալերիա Սորոկինան: Նրա ամուսինն ու բժիշկները տեղի ունեցածի տարբեր վարկածներ ունեն, որը երիտասարդ աղջկա մահվան է բերել:

Վալերիա Սորոկինան «Սուրբ Գրիգոր Լուսավորիչ» հիվանդանոց է տեղափոխվել օգոստոսի 26-ին: Ինչպես NEWS.am Medicine-ի հետ զրույցում պատմեց Սորոկինայի ամուսինը՝ Արթուր Թադեւոսյանը, հիվանդանոց ընդունվելիս նա գանգատվել է միրգ գործածելուց հետո փորի ցավերից: Ընդ որում, նրա խոսքով, կինն ի վիճակի էր ինքնուրույն գնալ հիվանդասենյակ: Թադեւոսյանը տեղեկացրեց, որ նույն օրը նրանից արյան անալիզ են վերցրել, եւ գլյուկոզայի ցուցանիշները նորմայի սահմաններում էր:

«Հաջորդ օրը մենք գնացինք հիվանդանոց նրան տուն տանելու: Նա ինքն իրեն նման չէր, պառկած տնքում էր: Բժիշկները մեզ բացատրեցին, որ մրսել է, գիշերը նյարդային վիճակում է եղել, նրան դիազեպամ են տվել: Նրան կատարեցին արյան կրկնակի անալիզ, եւ պարզվեց, որ գլյուկոզան բարձրացել է մինչեւ 20»,- պատմեց նա:

Բուժման ընթացքում Սորոկինան մի օր կարճ ժամանակով գիտակցության է եկել, սակայն այնուհետեւ նրա վիճակը վատթարացել է: Բժիշկները աղջկա մերձավորներին բացատրել են, որ նրա մոտ ասպիրացիոն թոքաբորբ է: «Սեպտեմբերի 3-ին մահվանից 4 ժամ առաջ նա ուռեց, սակայն մեզ բացատրեցին, որ դա թոքերի օդափոխության արհեստական սարքին միացնելու հետեւանքով է եւ կանցնի: Եվս 2 ժամ հետո բժիշկները ռենտգեն արեցին եւ հայտարարեցին, որ նրա թոքերի ու բրոխների հետ ամեն ինչ կարգին է»,- հայտնեց Թադեւոսյանը:

Մինչդեռ փորձաքննությունից հետո ազգականներին տեղեկացրել են, որ աղջկա թոքերից մեկը քայքայած էր եւ «պատռված»: Թադեւոսյանի կարծիքով՝ բուժման ընթացքում նրան 15-20 անգամ թոքերի ռենտգեն են արել, եւ բժիշկները մերձավորներին ասում էին, թե «ամեն ինչ լավ ուղղությամբ է գնում»: «Արդյունքում նա մահացավ «պատռված» թոքի պատճառով: Եթե դա ժամանակին  հայտնաբերվեր, ապա բժիշկները կկարողանային նրան վիրահատել եւ կյանքը փրկել»,- հայտարարեց նա:

Թադեւոսյանը նշում է նաեւ, որ հիվանդանոցում գողացել են Սորոկինայի նշանի մատանին: Նրա խոսքով՝ նա այս հարցով չի դիմել քննչական մարմիններին, քանի որ ուշ է նկատել կորուստի փաստը: «Նրա մարմինը դիահերձարանում էր, մինչ ես պատրաստում էի բոլոր անհրաժեշտ փաստաթղթերը, որ նրան վերցնեի: Այն, որ մատանին չկար, հայտնաբերեցի Ռուսաստան թռչելուց տառացիորեն մի քանի ժամ առաջ: Ես այդ մասին հայտնեցի հիվանդանոցի տնօրենին, ասացի, որ դա մարդկային չէ եւ անհրաժեշտ է լավ հետեւել սեփական բժիշկներին: Ես ոչ մի փոխհատուցում չէմ ուզում, ես ուզում եմ, որ մատանին ինձ վերադարձնեն»,- նշեց նա:

«Սուրբ Գրիգոր Լուսավորիչ» ԲԿ տնօրեն Արման Հովակիմյանը NEWS.am Medicine-ի հետ զրույցում  տեղեկացրեց, որ Սորոկինան հիվանդանոց է ընդունվել օգոստոսի 26-ին մշուշոտ գիտակցության վիճակում: «Նման հիվանդների մոտ հաճախ են դիտվում թուլություն, սրտխառնոց, փսխում, փորացավեր: Կլինիկա ընդունվելու օրը համանման գանգատներ ուներ Սորոկինան»,- հայտնեց նա՝ հավելելով, որ կնոջ ազգականների խոսքով՝ իրենք դիաբետի մասին ոչ մի բան չգիտեին:

Անհրաժեշտ հետազոտություններից եւ անալիզներից հետո սկսվել է ինսուլինի ներերակային ներարկում: Հաջորդ օրը բարձրացել է նրա ջերմությունը, վիճակը վատթարացել է երիկամային ֆունկցիայի վատթարացման  եւ դիուրեզի նվազման ֆոնին, հիվանդը միացվել է թոքերի արհեստական օդափոխության սարքին:

«Բարձր լեյկոցիտոզի եւ շնչառական ուղիներում սննդի մնացորդների հայտնաբերման ֆոնին, որը կարող էր հայտնվել նախակոմայի ժամանակ փսխման ընթացքում, վարակի առաջին կասկածը թոքերի բորբոքումն է: Վերջինիս կապակցությամբ ներերակային հակաբիոտիկային թերապիա է սկսվել:

Հաջորդ մի քանի օրվա ընթացքում հիվանդի վիճակը համեմատաբար կայուն է գնահատվել, արյան մեջ լեյկոցիտների եւ գլյուկոզայի մակարդակը դինամիկորեն նվազել են: Մահվան օրը հիվանդի վիճակը կտրուկ վատթարացել է, ենթամաշկային էմֆիզեմա է զարգացել, անցկացվել է կրծքի վիրաբույժի կոնսուլտացիա, ռենտգենոգրաֆիա եւ բրոնխոսկոպիա, թոքամզի խոռոչների դրենաժավորում»,- ասաց հիվանդանոցի տնօրենը:

«Ամենայն հավանականությամբ, հիվանդի մոտ զարգացել է դեստրուկտիվ թոքաբորբ եւ թոքամզի խոռոչ օդ է մղվել, հարազատները կասկածում են, որ դրանում մեղավոր է արհեստական շնչառության սարքը: Սակայն թոքերի դեստրուկցիայի առաջնային պատճառը թոքերի վարակն է»,- ասաց Հովակիմյանը:

Նրա խոսքով՝ տեսականորեն առաջնային վարակը կարող էր վիրուսային լինել կամ թոքերի մեջ փսխուքի զանգվածի հետ սննդի մնացորդների հայտնվելու հետեւանք: Ստամոքսի աղաթթուն արագ քայքայում է թոքերի էպիթելերը, եւ բորբոքումն արագ զարգանում է:

Ինչ վերաբերում է մատանու կորստին, ապա Հովակիմյանը նշեց. «Եթե դա համապտասխանում է իրականությանը, ապա մենք ամբողջությամբ կփոխհատուցենք վնասը: Մենք քննարկել ենք իրավիճակը վերակենդանացման բաժանմունքի վարիչի հետ, նրա խոսքով՝ կնոջ վրա միայն ականջօղեր կային, որոնք հարազատներին վերադարձրել են մինչեւ մահը»:

Հավելենք, որ Արթուր Թադեւոսյանը եւ Վալերիա Սորոկինան ունեն 3-ամյա դուստր: Թադեւոսյանը Ռուսաստանում է բնակվում, սակայն սեպտեմբերի 15-ին Հայաստան է վերադարձել՝ սպասելու դատաբժշկական փորձաքննության արդյունքներին. «Ես այստեղ կմնամ մինչեւ հասնեմ այս պատմության լուծմանը»:

Հետևեք NEWS.am Medicine-ին Facebook-ում և Twitter-ում


 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է