• Latest news

Փորձագետ. Տղամարդկանց մոտ կրծքագեղձի քաղցկեղն ավելի ագրեսիվ է ընթանում

15 հոկտեմբերի, 2018  14:30

Տղամարդկանց մոտ կրծքագեղձի քաղցկեղն ավելի ագրեսիվ է ընթանում: Այս մասին հոկտեմբերի 15-ին մամուլի ասուլիսի ժամանակ հայտնեց Հայ-ամերիկյան առողջության կենտրոնի ճառագայթային թերապիայի բաժանմունքի վարիչ Հովհաննես Վարդեւանյանը:

Տղամարդկանց շրջանում կրծքագեղձի քաղցկեղը զգալիորեն ավելի հազվադեպ է հանդիպում, քան կանանց շրջանում. Վարդեւանյանի խոսքով՝ 19 տարում Հայ-ամերիկյան առողջության կենտրոնում հայտնաբերվել է շուրջ 30 դեպք: Միաժամանակ, իր ագրեսիվ ընթացքի պատճառով քաղցկեղի այս տեսակը կարող է ուժեղ սեռի ներկայացուցիչներին լուրջ վտանգ սպառնալ: Սրա հետ կապված փորձագետը տղամարդկանց խորհուրդ տվեց ուշադրություն դարձնել կրծքի ցանկացած փոփոխության վրա եւ փոփոխություն նկատելու դեպքում անմիջապես բժշկի դիմել:

Տագնապահարույց նշաններ կարող են լինել մաշկի փոփոխությունները, պտուկի ձեւի փոփոխությունները, պտուկից արյունոտ հեղուկի արտադրությունը:

Ինչ վերաբերում է կանանց, ապա Հայաստանում, ինչպես ամբողջ աշխարհում, կրծքագեղձի քաղցկեղը չարորակ ուռուցքային հիվանդությունների այլ տեսակների շարքում առաջատար դիրքեր է գրավում: Վարդեւանյանը շեշտեց, որ վաղ փուլերում կրծքագեղձի քաղցկեղի հայտնաբերումը առանցքային դեր է խաղում բուժման հաջողության գործում:

Մինչեւ 35 տարեկան կանանց խորհուրդ է տրվում պարբերաբար գինեկոլոգի մոտ խորհրդատվություն ստանալ, որը կարող է հետազոտել կրծքագեղձը՝ ստուգելով կոշտացումների առկայությունը եւ անհրաժեշտության դեպքում ուղարկել էխոգրաֆիայի: 35 տարեկանից հետո խորհուրդ է տրվում տարեկան մեկ անգամ մամոգրաֆիա անցնել: Կապված այն հանգամանքի հետ, որ հոկտեմբերը հայտարարված է կրծքագեղձի քաղցկեղի դեմ պայքարի ժամանակահատված, Հայ-ամերիկյան առողջության կենտրոնում այս ժամանակահատվածում մամոգրաֆիան անցկացվում է նախկին 20 հազար դրամի փոխարեն 15 հազար դրամով:

Վարդեւանյանը նշեց, որ կանայք չպետք է արհամարհեն կանխարգելիչ հետազոտությունները, հատկապես հաշվի առնելով այն, որ կրծքագեղձի քաղցկեղի զարգացման վրա ազդում է այնպիսի գործոնների հանրագումարը, ինչպիսին են՝ գենետիկ նախահակվածությունը, վնասակար սովորությունները, կրծքագեղձի վնասվածքները, սթրեսը:

Փորձագետը նշեց Հայաստանում կրծքագեղձի քաղցկեղի վաղ հայտնաբերման սքրինինգային ծրագրերի անհրաժեշտությունը: Նրա խոսքով՝ այս հարցը բազմիցս  քննարկվել է Հայաստանի առողջապահության նախարարության մակարդակով:

Հետևեք NEWS.am Medicine-ին Facebook-ում և Twitter-ում


 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է