Հակաօքսիդանտներով սննդային հավելումները կարող են արագացնել չարորակ ուռուցքների աճը. հետազոտություն

Չարորակ ուռուցքների դեպքում հակաօքսիդանտների ընդունումը լավագույն միտքը չէ. գիտնականները նոր ապացույցներ են ստացել այն մասին, որ հակաօքսիդանտներով սննդային հավելումները կարող են արագացնել չարորակ ուռուցքների աճը:

University of Gothenburg-ի (Շվեդիա) գիտնականների փորձերը մարդկանց եւ կենդանիների քաղցկեղային հյուսվածքների վրա հաստատում են, որ հակաօքսիդանտներն արագացնում են ամենավտանգավոր ուռուցքներից մեկի՝ մելանոմայի աճը:

«Հակաօքսիդանտները քաղցկեղի բուժման միջոց չեն: Լավագույն դեպքում դրանք ազդեցություն չեն ունենա, բայց կարող են նաեւ վատթարացնել հիվանդության ընթացքը», - վերոնշյալ համալսարանից նշել է Քրիստել Լե Գալ Բեներոսոն:

Գաղափարը, որ հակաօքսիդանտները ազատ ռադիկալները չեզոքացնելու ունակության շնորհիվ պաշտպանում են քաղցկեղից, վերջին տարիներին կասկածի տակ էր դրվել: Գիտնականները պարզել են, որ հակաօքսիդանտները պաշտպանում են ոչ միայն նորմալ, այլեւ քաղցկեղային բջիջները, հենց այդ պատճառով, եթե օրգանիզմում արդեն ուռուցք կա, հակաօքսիդանտների պատճառով իրավիճակը կարող է փոխվել:

Գյոթեբորգից նույն հետազոտական խումբը՝ պրոֆեսոր Մարտին Բերգոյի գլխավորությամբ ցույց է տվել, որ մելանոմայի եւ թոքերի քաղցկեղի մետաստազը ուժեղանում է որոշակի հակաօքսիդանտների օգտագործումից:

Քրիստել Լե Գալ Բեներոսոն ուսումնասիրել է, թե ինչպես են մարդկանց եւ մկների թոքերի քաղցկեղի եւ մելանոմայի բջիջներն արձագանքում որոշ հակաօքսիդանտների առկայությանը: Վերջիններս կապվել են միտոքոնդրիումների հետ, որոնք պատասխանատու են ազատ ռադիկալների սինթեզի համար:

Այսպիսով, գիտնականները խորհուրդ չեն տալիս հակաօքսիդանտներով սննդային հավելումներ ընդունել: Տեսականորեն դրանք կարող են առողջ մարդկանց օգնել կանխարգելել քաղցկեղը, սակայն եթե մարդու մոտ կա չբացահայտված ուռուցք, հակաօքսիդանտների ընդունումը կարող է վտանգավոր լինել, զգուշացնում են փորձագետները:

Հետևեք NEWS.am Medicine-ին Facebook-ում և Twitter-ում