Երեկոյան սնվելը առողջության համար վնասակար է

Երեկոյան սնվելը առողջության համար վնասակար է: Ինչպես նշում է Ամերիկյան սրտաբանական ասոցիացիայի գիտանականների խումբը, ուշ ուտելը դիաբետի եւ սիրտ-անոթային հիվանդությունների զարգացման վտանգ է պարունակում:

LiveScience-ը հայտնում է, որ հետազոտության շրջանակում վերլուծվել են 18-ից 76 տարեկան ավելի քան 12,7 հազար լատինաամերիկացիների բժշկական հետազոտությունների տվյալները: Բժիշկները 2 օրվա ընթացքում համեմատել են կամավորների առողջական վիճակը եւ սնվելու ժամանակը:

Պարզվել է՝ նրանք, ովքեր ժամը 18:00-ից հետո գործածել են օրվա սննդակարգի 1/3-ը եւ ավելի շատ, արյան մեջ շաքարի եւ ինսուլինի ավելի բարձր մակարդակ են ունեցել: Դրանից բացի, նրանք արյան ավելի բարձր ճնշում են ունեցել՝ նրանց համեմատությամբ, ովքեր սննդամթերքները գործածել են մինչեւ երեկոյան ժամը 6-ը:

Մարդկանց այս խմբում հայտնաբերվել է նաեւ նախադիաբետի հանդեպ 19 տոկոսով ավելի մեծ հակվածություն եւ 23 տոկոսով ավելի մեծ հակվածություն հիպերտոնիայի զարգացման հանդեպ:

Գիտնականները սա պատճառաբանում են սխալ կենսակերպի հետեւանքով մարդու կենսաբանական ռիթմերի խանգարմամբ: Սա, իր հերթին, բերում է նյութափոխանակության խնդիրների՝ մեծացնելով քրոնիկական հիվանդությունների զարգացման հավանականությունը:

Հետևեք NEWS.am Medicine-ին Facebook-ում և Twitter-ում