Սաղմերի գենետիկ փորձարկման ոլորտի նվաճումներ. քայլ «դիզայներական երեխաների» ստեղծման ուղղությա՞մբ

Վերջին շրջանում մենք ավելի հաճախ ենք լսում սաղմերի գենետիկ թեստավորման նոր մեթոդների մասին, որոնք ավելի շատ հնարավորություններ են ստեղծում «դիզայներական երեխաների» ստեղծման համար. ծնողների ցանկություններով գենետիկ մակարդակում բառացիորեն «հավաքված» երեխաների: Օրինակ՝ ամերիկյան Genomic Prediction  ընկերությունը վերջերս թեստ է մշակել, որը թույլ կտա արտամարմնային բեղմնավորման ժամանակ ընտրել ավելի բարձր մակարդակի ինտելեկտով սաղմերին:

Այսօրվա դրությամբ սաղմի գենետիկ կազմի փոփոխությունը հնարավոր է երկու մեթոդով: Առաջին՝ սկզբում վերցնում են երկու ծնողների եւ սաղմի գենետիկ նյութի նմուշները: Հետո համակարգչային ծրագիրը փորձում է իդեալին ավելի մոտ եւ ավելի ամբողջական քրոմոսոմային պրոֆիլ ստեղծել սաղմի համար: Երկրորդ՝ սաղմի ԴՆԹ-ի վերծանում է կատարվում: Հավաքված տեղեկատվությունը բեռնվում է ծրագրի մեջ, որը որոնում է հիվանդությունների զարգացման կամ շեղումների հնարավոր նշանները:

Տեսականում նույն ձեւով կարելի է առանձնացնել ինտելեկտուալ զարգացման, աչքերի գույնի եւ ապագա երեխայի այլ բնութագրումների մարկերները:

Այնուհետ մասնագետները պետք է ճշգրիտ «ուղղեն» գենոմն այնպես, ինչպես այն ցանկանում են ապագա ծնողները:

 Նման լուրերը սակայն անկախ փորձագետների մոտ տագնապներ են առաջացնում: Նրանց խոսքով, կատարյալ երեխա ստեղծելու փորձերը կարող են հանգեցնել հղիության ընդհատման, եթե գենետիկ անալիզը իրականի եւ ցանկալիի անհապատասխանություն հայտնաբերի:

Գենետիկ փորձարկման ոլորտում աշխատող ընկերությունների ներկայացուցիչների խոսքով, նրանք դեռ կենտրոնացած են միայն ապագա երեխաների մոտ գենետիկ հիվանդությունների հայտնաբերմանը: Սակայն գենետիկ փորձարկման մեթոդների հակառակորդները վստահ են, որ մոտ ապագայում լույս աշխարհ կգան ասյպես կոչված «դիզայներական երեխաները»:

Հետևեք NEWS.am Medicine-ին Facebook-ում և Twitter-ում