Նոյեմբերի 19-ին և 20-ին Երևանի Պետական Բժշկական Համալսարանի շուրջ 300 ուսանողներ, պրոֆեսորադասախոսական կազմի և ԲՈՒՀ-ի ղեկավարության ներկայացուցիչներ դոնորագրվեցին Ոսկրածուծի Դոնորների Հայկական Ռեեստրում:
Ինչպես NEWS.am Medicine-ին տեղեկացրեցին Ռեեստրից, այս պահին Ռեեստրում գրանցվախ պոտենցիալ դոնորների թիցը հասնում է 30 000:
Հիշեցնենք, որ Ոսկրածուծի դոնորների հայկական ռեեստրը հիմնադրվել է 1999 թվականին և գրանցվել է որպես շահույթ չհետապնդող բարեգործական կազմակերպություն: Հիմնադրամի առաքելությունն է օգնել աշխարհասփյուռ հայորդիներին հաղթահարելու արյան մի շարք մահացու հիվանդությունները, որոնք հաճախ բուժվում են ոսկրածուծի/ցողունային բջիջների փոխպատվաստմամբ: Հիմնադրամի նպատակն է հիվանդի համար գտնել ոսկրածուծի/ցողունային բջիջների համապատասխան դոնոր, կազմակերպել դոնորի հավաքագրում համայն հայության շրջանում:
Մինչ օրս ռեեստր դիմած 4885 հիվանդի հետ նախնական համընկնող 4469 պոտենցիալ դոնոր է հայտնաբերվել, որոնցից 31-ը նվիրաբերել են իրենց արյան ցողունային բջիջները:
Ցողունային բջիջների փոխպատվաստման միջոցով արյան չարորակ հիվանդությունների բուժման արդյունավետությունը բավականին բարձր է, եթե իհարկե հաջողվում է դոնորի գտնել, որը գենետիկորեն 100 տոկոսով համատեղելի է հիվանդի հետ. միայն այդ դեպքում օրգանիզմը չի վանի փոխպատվաստված բջիջները: Օրինակ, լեյկոզի դեպքում ցողունային բջիջների փոխպատվաստումից հետո ողջ է մնում հիվանդների 90 տոկոսը:
Հիշեցնենք, որ պոտենցիալ դոնոր դառնալու համար հարկավոր է լինել 18-50 տարեկան, հանձնել 3մլ արյուն և լրացնել հարցաթերթիկ: Դոնորագրվելն անվնաս և անցավ գործընթաց է, տևում է հաշված րոպեներ, սակայն հնարավորություն է տալիս հետագայում համատեղելիության հայտնաբերման դեպքում փրկել մեկ կյանք:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր