Մանկության տարիների ծաղրանքները կարող են մեծ տարիքում լուրջ խնդիրների հանգեցնել: Այս մասին այսօր ասուլիսին ասաց հոգեբան Տաթեւիկ Նահապետյանը:
Փորձագետն անընդունելի համարեց այն, որ ոմանք ֆիզիկական բռնությունը դաստիարակության լավ մեթոդ են համարում:
«Ինչպես ֆիզիկական, այնպես էլ հոգեբանական բռնությունը կարող են բացասաբար ազդել երեխայի զարգացման վրա: Դրա հետեւանքով կարող է խուճապի, վախի զգացողություն, քնի եւ ախորժակի խանգարումներ նկատվեն», - ասաց նա:
Սթրեսի ֆիզիկական նախանշաններից կարող են լինել դողը, մարմնի ցանը:
«Դեռահասների մոտ ֆիզիկական եւ հոգեբանական ճնշման վտանգը կայանում է նրանում, որ դեռահասը դեռեւս չունի իր «եսի» մասին հստակ պատկերացում, գտնվում է ճնշված վիճակում: Ծաղրը կարող է նրան ինքնասպանության մտքերի հանգեցնել, մղել նրան տնից փախչել», - ասաց Նահապետյանը:
Դեռահասության եւ մանկական տարիքում վերապրած ծաղրերի հետեւանքները կարող են տարիներ եւ անգամ տասնամյակներ հետո ի հայտ գալ:
Տագնպայաին հիշողությունները կարող են դեպրեսիայի պատճառ դառնալ, երբ մեծահասակը վախենում է որոշումներ կայացնել, չի կարողանում անձնական կյանքը կարգավորել:
Այս կապակցությամբ հոգեբանը ծնողներին կոչ արեց ավելի ուշադիր վերաբերվել երեխայի հոգեկան վիճակին եւ ուշադրություն դարձնել, երբ օրինակ երեխան չի ցանակնում դպրոց գնալ, հաղորդակցման հետ խնդիրներ ունի, մեկուսանում է եւ այլն:
Ընդ որում ծնողները կարող են փորձել երեխայի հետ հանգիստ խոսել, կամ դիմել մասնագետի:
«Ընտանեկան մթնոլորտը կարեւոր դեր է խաղում: Ընտանիքում պետք է էմոցիոնալ հարմարավետության մթնոլորտ լինի, ծնողները պետք է ցույց տան, որ հավատում են երեխային եւ ննրա կարողություններին», - ընդգծեց նա:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր