Բազմաթիվ են խնդիրները, ֆինանսավորումը բավարար չէ. «Նուբարաշեն» հոգեբուժական կլինիկան նոր տնօրեն ունի

Այսօր «Նուբարաշեն» հոգեբուժական կլինիկայում շատ են ինչպես փոքր, այնպես էլ մեծ խնդիրները, եւ դրանց լուծման համար քիչ ժամանակ չի պահանջվելու: Անհրաժեշտ են լուրջ փոփոխություններ եւ բարեփոխումներ, որոնց արդյունքները կարելի կլինի գնահատել միայն մեկ-մեկուկես տարի հետո: Այս մասին NEWS.am Medicine-ի թղթակցի հետ զրույցում նշել է Սերգեյ Խաչատրյանը, ով 2018 թվականի դեկտեմբերի 28-ին նշանակվել է «Հոգեկան առողջության պահմանման ազգային կենտրոն» ՓԲԸ-ի տնօրեն («Նուբարաշեն» հոգեբուժական կլինիկա):

Նրա խոսքերով, «Նուբարաշենը» ունի անհարժեշտ ամեն ինչ, որպեսզի մի օր իսկապես դառնա հոգեկան առողջության պահպանման համար ազգային կենտրոն, ինչպես որ հռչակում է նրա պաշտոնական անվանումը: Բայց խնդիրները, որոնք պետք է լուծվեն այս ճանապարհին, իսկապես բազմաթիվ են՝ ենթակառուցվածքայինից եւ կազմակերպչականից մինչեւ կադրային եւ ֆինանսական: Օրինակ՝ կենտրոնի մասնաշենքերի միջեւ հեռախոսային կապ չկա, ինչը բացասաբար է անդրադառնում աշխատանքի արդյունավետության վրա: Կլինիկայի ղեկավարությունն այժմ փորձում է ապահովել բոլոր շենքերը հեռախոսակապով եւ ռադիոկապով: Բացի այդ, արդեն որքան ժամանակ է կոյուղային համակարգը չի աշխատում։ Այսօր մի քանի մասնագետներ են այցելել կենտրոն`պարզելու համար, թե ինչպիսի վերանորոգման կարիք կա, որպեսզի կենտրոնի բոլոր մասնաշենքերը պատշաճ կերպով գործող կոյուղագծեր ունենան:

Առկա խնդիրների մեծ մասի հիմքում փողն է, սակայն պետության կողմից հատկացված ֆինանսավորումը բավարար չէ ամեն ինչի համար: Հնարավոր է, որ ապագայում կենտրոնում վճարովի ծառայություններ ի հայտ գան, որոնք կօգնեն լրացուցիչ միջոցներ ներգրավել, սակայն այս հարցը դեռեւս քննարկման փուլում է:

Մինչեւ հոգեբուժական կլինիկայի ֆինանսավորման ծավալները կմեծանան, հասարակությունը կարող է կլինիկային օգնության հասնել՝ օրինակ, հիվանդների համար տաք հագուստի եւ կոշիկների հավաքագրում կազմակերպելով:

Ինչպես նշել է Սերգեյ Խաչատրյանը, հիվանդները հաճախ են գնում կենտրոնի տարածքում զբոսնելու, բայց ձմռանը դա վերածվում է իրական խնդրի, քանի որ ոչ բոլորը տաք հագուստ եւ կոշիկ ունեն: Իհարկե, որոշ հիվանդների հարազատներ մշտապես կապ են պահում նրանց հետ եւ ապահովում նրանց այն ամենով, ինչ անհրաժեշտ է, բայց կան նաեւ հիվանդներ, որոնք ոչ ոք չունեն, կամ որոնց ընտանիքներն աղքատ են: Եթե հանրությունը կարողանա նման մարդկանց տաք հագուստով ապահովել, մաքուր օդին զբոսանքները զգալիորեն կբարձրացնեն նրանց կյանքի որակը:

Ինչ վերաբերում է կադրային քաղաքականությանը, ըստ Սերգեյ Խաչատրյանի, կենտրոնում կան խոստումնալից երիտասարդ մասնագետներ, եւ կան փորձառու տարեցներ, որոնցից ոմանք ստիպված կլինեն թոշակի անցնել: Բայց նրանց հետ կապը դրանից հետո չի կտրվի:

«Թոշակառուներին մենք հրաժեշտ չենք տա: Մենք փորձում ենք գտնել նրանց հետ համագործակցելու ուղիներ՝ նրանց ներգրավելով երիտասարդ մասնագետների վերապատրաստման մեջ: Այդպես են վարվում բոլոր բժշկական հաստատություններում․ երիտասարդները պետք է գան եւ սովորեն մեծահասակներից, մեծահասակները պետք է անցնեն թոշակի», - նշել է Սերգեյ Խաչատրյանը։

Հետևեք NEWS.am Medicine-ին Facebook-ում և Twitter-ում