• Latest news

Բուսական դեղամիջոցները եւ սննդային հավելումները հղիության ժամանակ կարող են վտանգավոր լինել. հետազոտություն

13 ապրիլի, 2019  20:06

Առաջին հայացքից «անմեղ» թվացող նույնիսկ բուսական միջոցները հղիության ժամանակ կարող են վտանգավոր լինել ինչպես մոր, այնպես էլ պտղի համար, նախազգուշացնում են մասնագետները: Շոտլանդացի գիտնականները կատարել են նախկինում հրապարակված 74 հետազոտությունների ամփոփում եւ ցույց տվել, որ բուսական բիոհավելումների որոշ տեսակներ կապված են հղիության բարդությունների, ներառյալ վաղաժամ ծննդաբերության եւ կեսարյան հատման մեծ հավանականության հետ: Այս հետազոտությունը հրապարակվել է Obstetrics & Gynecology ամսագրում:

Հարցումների համաձայն՝ տարբեր երկրներում հղի կանանց 10 տոկոսից մինչեւ երեք քառորդը բուսական դեղամիջոցներ է ընդունում հիվանդությունների ախտանշանները թեթեւացնելու համար կամ որպես հավելում: Հեղինակները զգուշացնում են, որ բուսական միջոցները ոչ միշտ են անվտանգ, եւ անհրաժեշտ է ֆիտոթերապիայի կուրսից առաջ խորհրդակցել բժշկի հետ:

Դիտարկված հետազոտություններից մեկը ցույց է տվել, որ այն կանանց շրջանում, որոնք վերջին եռամսյակում մաշկի վրա նուշի յուղ են քսել, 2 անգամ մեծացել է վաղաժամ ծննդաբերության հավանականությունը: Երկու այլ հետազոտություններով համանման վտանգներ են հայտնաբերվել այն կանանց շրջանում, որոնք հղիության ամբողջ շրջանում գործածել են սեւ մատուտակի կոնֆետներ (այրոցի եւ աղեստամոքսային այլ խանգարումների դեմ ժողովրդական միջոց):

Մեկ այլ հետազոտության մեջ դիտարկվել է ազնվամորու տերեւների գործածումը, որոնք ծնունդը խթանում եւ կրճատում են: Կանայք, որոնք օգտագործել են այս միջոցը, 3,5 անգամ ավելի հաճախ են կեսարյան հատման կարիք ունեցել, քան մյուս կանայք:

Մալավիում անցկացված հետազոտությունը ցույց է տվել, որ կանայք, որոնք օգտագործել են մվանաֆեպո (mwanaphepo, աֆրիկական ավանդական բուսական միջոց, որն օգտագործվում է ծնունդը խթանելու համար), ավելի հաճախ են կեսարյան հատման կարիք ունեցել եւ ավելի հաճախ են բախվել ծննդաբերական բարդությունների եւ նույնիսկ նորածնի մահվան:

Հետազոտության հեղինակներն ընդգծում են, որ բուսական դեղամիջոցները նույնպես դեղամիջոց են, իսկ ծագման «բնական» լինելը դեռ չի երաշխավորում դրանց անվտանգությունը. ինչպես մյուս դեղերը, բուսական դեղամիջոցները կարող են կողմնակի էֆեկտներ առաջացնել: Օրինակ՝ ազնվամորու տերեւները կարող են առաջացնել սրտխառնոց, գլխացավ, աղիների խանգարում եւ գլխապտույտ, իսկ կոճապղպեղը՝ բերանի չորություն, այրոց եւ գլխացավ: Շամբալան, որը խորհուրդ են տալիս կրծքի կաթի ավելացման համար, կարող է մաշկային ռեակցիաներ եւ գլխացավ առաջացնել:

Հեղինակները հիշեցնում են, որ կանաչիները նույնպես քիմիական նյութեր են պարունակում, որոնցից շատերն ազդում են օրգանիզմի վրա:

Հետևեք NEWS.am Medicine-ին Facebook-ում և Twitter-ում


 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է