Աղիքներում բակտերիաները որոշ դեղերի թույլ չեն տալիս ճիշտ գործել. հետազոտություն

Երբեմն աղիքներում բնակվող բակտերիաները դեղամիջոցները չեզոքացնում են դեռեւս մինչ այն, երբ դրանք հասցնում են հասնել իրենց թիրախին, պնդում են Հարվարդի համալսարանի գիտնականները:

Սա կարող է բացատրել, թե ինչու են որոշ դեղեր մարդկանցից ոմանց օրգանիզմում գերազանց գործում, իսկ մյուսների օրգանիզմում ոչ մի արձագանք չեն առաջացնում:

Նման բան հաճախ է տեղի ունենում, օրինակ, Պարկինսոնի հիվանդության դեմ դեղերի դեպքում:

The Daily Mail-ը հայտնում է, որ որոշ դեպքերում դեղամիջոցներն այն բանից հետո, երբ դրանց «ուտում» են աղիքների բակտերիաները, կարող են դառնալ ոչ միայն ոչ արդյունավետ, այլեւ թունավոր: Գիտնականները սա ստուգել են L-dopa-ի օրինակով՝ միջոց, որը մասամբ փոխարինում է պարկինսոնիզմով պացիենտների ուղեղում դոֆամինին:

Պարկինսոնի հիվանդության տարբեր փուլերով մարդկանց հետազոտության ընթացքում բժիշկները նկատել են, որ չնայած դեղամիջոցում դոպամինի զգալի պարունակությանը, ուղեղ էր հասնում այս հորմոնի ընդամենը 3-5 տոկոսը: Սկզբում նրանք պարզապես մեծացրել են դեղաչափը, բայց խնդիրն այն էր, որ ուղեղից դուրս դոպամինի հայտնվելը տհաճ կողմնակի էֆեկտներ էր առաջացնում, ներառյալ ստամոքսի խանգարում եւ առիթմիա: Դրանից բացի, լուծված չէր գլխավոր խնդիրը՝ գիտնականները չէին կարողանում հասկանալ, թե ինչու էր դեղամիջոցը ոմանց հրաշալի օգնում, իսկ մյուսներին՝ ոչ:

Հետագա դիտարկումները ցույց են տվել, որ դեղամիջոցներն ավելի լավ են «աշխատել», եթե պացիենտները կարճ ժամանակ առաջ հակաբիոտիկներ են ընդունել: Սա հետազոտողներին մղել է այն մտքին, որ կարող է կապ լինել աղիքների մանրէների եւ դեղամիջոցի արդյունավետության միջեւ:

Փորձերի շարքից հետո գիտնականներին հաջողվել է պարզել, որ կղանքային էնթերոկոկը, որը մարդու աղեստամոքսային տրակտում բնակվող բակտերիա է, «ուտում» է եւ գրեթե ամբողջությամբ յուրացնում օրգանիզմ ընկած դեղը:

Գիտնականներին նաեւ հաջողվել է մոլեկուլ հայտնաբերել, որը կարող է բակտերիաներին «սանձահարել», ընդ որում՝ դրանք չոչնչացնելով: Գիտնականները վստահ են, որ այս հայտնագործությունն իրենց կօգնի ապագայում ավելի արդյունավետ դեղամիջոցներ մշակել Պարկինսոնի հիվանդությամբ պացիենտների համար:

Հետևեք NEWS.am Medicine-ին Facebook-ում և Twitter-ում