Գիտնականները հայտնի ցավազրկող միջոցի նոր կողմնակի էֆեկտ են բացահայտել

Ամերիկացի գիտնականները նկարագրել են հայտնի ցավազրկող տրամադոլի գործածման նոր կողմնակի էֆեկտը. պարզվում է, որ այն գործածել սկսելուց հետո մարդկանց արյան մեջ գլյուկոզայի խտությունը նվազում է եւ կարող է առաջանալ հիպոգլիկեմիա: Հետազոտությունը հրապարակվել է Scientific Reports ամսագրում:

Մասնագետներն ուսումնասիրել են Սննդամթերքի եւ դեղորայքի որակի սանիտարական վերահսկողության վարչության 2004-2019 թվականների ավելի քան 12 մլն գրառումների տվյալները, որոնցում հիշատակվում են տրամադոլի կողմնակի էֆեկտները: Նրանք ուշադրություն են դարձրել այն փաստին, որ տրամադոլի ընդունումը կարող է նվազեցնել արյան մեջ գլյուկոզայի պարունակությունը եւ հիպոգլիկեմիայի բերել: Սա կարող է անչափ վտանգավոր լինել շաքարային դիաբետով տառապող մարդկանց համար:

Հետաքրքիր է, որ այլ ափիոնոիդային դեղամիջոցների դեպքում այդպիսի կապ չի դիտվում: Գիտնականների խոսքով՝ տրամադոլի գործածման դեպքում հիպոգլիկեմիայի զարգացման հավանականությունը տասնյակ անգամ բարձր է, քան այլ ափիոնոիդների գործածման դեպքում, եւ համեմատելի է հերոինային կախվածության բուժման համար կիրառվող մեթադոնի հետ:

Տրամադոլը հզոր ցավազրկող է, որը կիրառվում է միջին եւ ուժեղ ինտենսիվության ցավային համախտանիշներիի դեպքում, ցավոտ ախտորոշիչ կամ թերապեւտիկ միջոցառումներ անցկացնելիս եւ ափիոնայինների արգելման համախտանիշի բուժման համար:

Բժիշկի նշանակմամբ տրամադոլ ընդունող մարդուն կարելի խորհուրդ տալ հետեւել արյան մեջ գլյուկոզայի մակարդակին եւ դրա նվազում թույլ չտալ:

Հետևեք NEWS.am Medicine-ին Facebook-ում և Twitter-ում