Ներաճած եղունգի պատճառով դիաբետով տառապող աղջկա ոտքը ստիպված են եղել անդամահատել

Մեծ Բրիտանիայի Դերբիշիր քաղաքից 27-ամյա Հիզեր Սաթչվելլը վազքով էր զբաղվում, ինչը հանգեցրել է ներաճած եղունգի առաջացմանը, որն էլ, իր հերթին, փտախտ է առաջացրել: Արդյունքում բժիշկները ստիպված են եղել անդամահատել նրա ոտքը:

Հիզերը բարեգործական վազքի մրցույթի էր պատրաստվում, երբ ներաճած եղունգ է նկատել: Նա անմիջապես բժշկի է դիմել, քանի որ գիտեր, որ 1-ին տեսակի դիաբետի պատճառով նրա մոտ բարձր է վարակների և ոտնաթաթի նյարդերի վնասվածքների ռիսկը: Չնայած նրան, որ Հիզերը ժամանակին է օգնության դիմել, սակայն որոշ ժամանակ անց բժիշկները ստիպված են եղել անդամահատել ոտքը, քանի որ փտախտը չի հաջողվել կանգնեցնել, այն վարակել է առողջ հյուսվածքները:

Այժմ Հիզերը տեղաշարժվելու համար պրոթեզ և անվասայլակ է օգտագործում: Հիզերն ասել է, որ իր համար դժվար է, քանի որ 6 տարեկան աղջիկ ունի: Նրա ընտանիքը ստիպված է եղել հատուկ տուն տեղափոխվել, որտեղ հաշմանդամություն ունեցող մարդուն հարմար է տեղաշարժվել:

Տվյալ պատմությունը հերթական անգամ ապացուցում է, թե դիաբետ ունեցողների համար որքան կարևոր է ժամանակին հետազոտվելը: Որքան շուտ նշանակվեն բակտերիալ վարակների դեմ հակաբիոտիկները, այնքան ավելի մեծ կլինի հավանականությունը, որ պաթոլոգիական պրոցեսը կկանգնեցվի:  

Հետևեք NEWS.am Medicine-ին Facebook-ում և Twitter-ում