• Latest news

12 մահվան դեպք 11 ամսում․ Հայաստանում 2019 թվականին նախորդ 2 տարիների համեմատ աճել են մայրական մահացության դեպքերը

29 նոյեմբերի, 2019  15:35

2019 թվականին Հայաստանում գրանցվել է մայրական մահացության 12 դեպք: Նախորդ 2 տարիների համեմատ այս տարի մայրական մահացության ցուցանիշը աճել է. 2018-ին գրանցվել էր մայրական մահացության 8 դեպք, 2017-ին՝ 4 դեպք։ Համեմատության համար, 2016 թվականին կրկին գրանցվել էր մահվան 12 դեպք:

Այս տարվա մահվան դեպքերից 3-ը աղմկահարույց էին, որովհետև հարազատները ծննդկանի մահվան մեջ մեղադրում էին բժիշկներին: Ընդ որում՝ այս 3 դեպքերը իրար հաջորդելով տեղի ունեցան՝ հուլիս, օգոստոս և սեպտեմբեր ամիսներին: 3-ի դեպքում էլ քրեական գործ հարուցվեց:

Առողջապահության նախարարության Մայրական և վերարտադրողական առողջության պահպանման բաժնի պետ Գայանե Ավագյանը NEWS.am Medicine-ի հետ զրույցում նշեց, որ մայրական մահացության վիճակագրությունը սովորաբար դիտարկում են ոչ թե 1, այլ 3 տարվա կտրվածքով.

«Առողջապահության համաշխարհային կազմակերպությունն ասում է՝ մինչև 5 միլիոն բնակչություն ունեցող երկիրը ամեն տարի չպետք է մայրական մահացության դեպքերը ներկայացնի, այլ պետք է ներկայացնի մայրական մահացության ինդեքսը 3 տարվա կտրվածքով: Սկսած 2010 թվականից Հայաստանում մայրական մահացության ինդեքսը չի գերազանցում 20-ը», - ասաց նա:

Մասնագետի խոսքով, հղի կնոջ կամ ծննդկանի մահվան ցանկացած դեպք մանրամասն վերլուծվում է: Ըստ այդ վերլուծությունների տվյալների՝ Հայաստանում մանկաբարձական պատճառներով մահերը կազմում են հղիների եւ ծննդկանների մահերի 30-40%-ը, մնացած բոլորը կապ չունեն հղիության հետ. դրանք կնոջ՝ մինչեւ հղիությունն ունեցած հիվանդություններն են, որոնք երբեմն կարող են սրվել հղիության ժամանակ։

«Օրինակ՝ անալիզ ենք անում, տեսնում ենք, որ կինը մահացել է վիրուսային թոքաբորբից, կամ, օրինակ, լյարդի քաղցկեղից», - նշեց Գայանե Ավագյանը:

Նրա խոսքով՝ այսօր Հայաստանում մի շարք միջոցառումներ են իրականացվում մայրական մահացության դեպքերը կանխելու համար.

«Ամեն դեպքը վերլուծվում է նախարարի գլխավորությամբ: Հիմա մենք մայրական պոտենցիալն ենք փորձում բարելավել. 15 տարեկան աղջիկներին և տղաներին պետական պատվերով հետազոտում ենք, և եթե հայտնաբերվում են շեղումներ, ախտաբանություններ, բուժում ենք: Այսինքն՝ իրենց պատրաստում ենք նորմալ վերարտադրության: Մյուսը՝ մենք լայնացրել ենք հղիների հետազոտության ծավալները, որպեսզի հղիներին վերաբերող բոլոր խնդիրները կարողանանք վեր հանել: Նաև իրականացվելու է  մինչամուսնական հետազոտության և բուժման ծրագիր: Զագսում գրանցված զույգը կհետազոտվի, կհայտանբերվեն հիվանդությունները և կբուժվեն: Այս բոլորն արվում է պետության հաշվին», - ասաց Գայանե Ավագյանը:

Հետևեք NEWS.am Medicine-ին Facebook-ում և Twitter-ում


 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է