• Latest news

Մեր հակածխախոտային պայքարի արդյունքում 400-ից ավել մարդ հրաժարվել է ծխելուց. Արուսիկ Մկրտչյան

15 հունվարի, 2020  15:45

Հակածխախոտային պայքարն իրոք ազդեցություն է ունենում մարդկանց թե մտածելակերպի, թե վարքի վրա։ Շատերը, տեղեկանալով ծխախոտի վտանգների մասին, թողնում են ծխելը։ Հայտնի դիջեյ, «Եղիր իրազեկ» ՀԿ-ի նախագահ Արուսիկ Մկրտչյանը, ով 2009 թվականից Հայաստանում հակածխախոտային արշավներ է կազմակերպում, ավելի քան 400 այդպիսի դեպք գիտի։

NEWS.am Medicine-ի թղթակցին Արուսիկ Մկրտչյանը պատմեց, որ քարոզչությունը եւ գրագետ տեղեկատվության տարածումը հակածխախոտային պայքարում շատ կարևոր դեր ունեն։

«Սկզբում համերգներին զուգահեռ իրականացնում էինք նաև հակածխախոտային արշավը: Այս նախաձեռնությանը միացան շոու-բիզնեսի այլ ներկայացուցիչներ: Հետո արդեն սեմինարներ էինք անցկացնում ԲՈՒՀ-երում, դպրոցներում, մանկապարտեզներում, մանկատներում և այլ հաստատություններում: Մենք դեռահասներին, երիտասարդներին ոչ թե բարդ տերմինների միջոցով էինք բացատրում, թե ինչ վնասակար ազդեցություն կարող է ունենալ ծխելը, այլ պարզ, մատչելի օրինակներով էինք ներկայացնում ծխելու վտանգները», - պատմեց Արուսիկ Մկրտչյանը:

2012 թվականից Արուսիկ Մկրտչյանը հակածխախոտային պայքարը շարունակել է նաև համացանցում: Ֆեյսբուքում գործող «No smoking Armenia» անունով էջը խորհրդատվություն է տրամադրում այն մարդկանց, ովքեր փորձում են հրաժարվել ծխելուց: Այս խմբում աշխատում են հակածխախոտային արշավի մասնակիցները, բժիշկ, հոգեբան, իսկ բարդ դեպքերում մարդկանց օգնում է հոգեբույժը:

Արուսիկ Մկրտչյանը հույս ունի, որ հետագա տարիներին ծխելուց հրաժարվել ցանկացող մարդկանց հատուկ տարածք կտրամադրվի, որտեղ մարդիկ խորհրդատվություն կստանան, անհրաժեշտության դեպքում նաև կբուժվեն:

Արուսիկ Մկրտչյանի խոսքով՝ ծխախոտի դեմ պայքարում շատ կարևոր են նաև սոցիալական հոլովակները, ցուցապաստառները:

«Վերջերս, օրինակ, Առողջապահության նախարարության նախաձեռնությամբ ամենամեծ հակածխախոտային պայքարը իրականացվեց հենց պոստեռների, սոցիալական հոլովակների միջոցով, որի աշխատանքային խմբում ներառված էի նաև ես: Այս նախաձեռնությունները դրական ազդեցություն են ունենում մարդկանց գիտակցության վրա: Նրանք հասկանում են, որ իրավունք ունեն չենթարկվել երկրորդային ծխի, ուստի փակ տարածքներում ծխելու սահմանափակմանը ևս դրական են վերաբերվում», - ասաց Արուսիկ Մկրտչյանը:

Հետևեք NEWS.am Medicine-ին Facebook-ում և Twitter-ում


 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է