Դիաբետի զարգացման անձնական հավանականությունը կարող է կախված լինել տեստոստերոնի մակարդակից

Տեստոստերոնի ավելցուկը տղամարդկանց դեպքում 2-րդ տիպի դիաբետի զարգացման հավանակութնունը նվազեցնում է, իսկ կանանց դեպքում այդ հավանականությունը մեծացնում: Այսպիսի եզրակացություն են կատարել Էքսեթերի համալսարանի գիտնականները:

Ինչպես հայտնում է ՏԱՍՍ-ը, հետազոտության ժամանակ գիտնականներին հետաքրքրել է մարմնի մեջ տեստոստերոնի մշտական ավելցուկը՝ պայմանավորված գենետիկ գործոններով: Նրանք օգտագործել են ավելի քան 400 հազար մարդկանց գենետիկ տվյալները: Նրանց հաջողվել է առանձնացնել 2500-ից ավելի գենետիկ տարբերակներ, որոնք արտացոլվում են օրգանիզմում տեստոստերոնի մակարդակի վրա:

Պարզվել է, որ տեստոստերոնի ավելցուկը տարբեր կերպ է ազդում տղամարդկանց եւ կանանց առողջության վրա: Այսպես՝ կանանց մոտ այն 37 տոկոսով մեծացրել է 2-րդ տիպի դիաբետի զարգացման հավանականությունը, 51 տոկոսով՝ ձվարանների պոլիկիստոզ համախտանիշը:

Տղամարդկանց մոտ, հակառակը, հորմոնի մեծ պարունակությունը 14 տոկոսով նվազեցրել է դիաբետով սպառնացող ինսուլինային ռեզիստենտության զարգացման հավանականությունը:

Կապ է հայտնաբերվել նաեւ տեստոստերոնի մակարդակի եւ կանանց դեպքում կրծքագեղձի, արգանդի քաղցկեղի զարգացման, տղամարդկանց դեպքում շագանակագեղձի քաղցկեղի զարգացման հավանականության միջեւ: Բոլոր դեպքերում քաղցկեղի այս տեսակների զարգացման հավանականությունը մեծացել է 10-23 տոկոսով՝ տեստոստերոնի մակարդակի մեծացմանը զուգահեռ:

Հետևեք NEWS.am Medicine-ին Facebook-ում և Twitter-ում