Բացառված չի, որ Քաջարանում կորոնավիրուսի նոր օջախ ձեւավորվի․ մասնագետ

Բացառված չի, որ Քաջարան քաղաքում կարող է կորոնավիրուսի նոր օջախ ձեւավորվի։ Նման կարծիք արտահայտեց ՀՀ Առողջապահության նախարարության «Հիվանդությունների վերահսկման և կանխարգելման ազգային կենտրոն» ՊՈԱԿ-ի վարակիչ հիվանդությունների համաճարակաբանության բաժնի պետ Լիանա Թորոսյանը։

Նրա խոսքով՝ մայիսի 24-ին տեղի ունեցած ցույցերին մասնակցում էին մարդիկ, ովքեր դիմակներ չէին կրում եւ սոցիալական հեռավորությունը չէին պահպանում, հետեւբար, բացառված չէ, որ նրանց այնտեղ վարակը տարածվեր։

«Բացառել կամ հաստատել հնարավոր չէ։ Ակտիվ շփումներ էին, մարդիկ կային, որ առանց դիմակների էին, առանց սոցիալական հեռավորության պահպանման, ինչը կարող է հիմք հանդիսանալ նոր օջախների ձեւավորման», - ասած մասնագետը։

Հիշեցնենք, որ Կապանում մայիսի 24–ին լարված իրավիճակ է ստեղծվել։ Ոստիկանության շենքի դիմաց հավաքվել են բազմաթիվ քաջարանցիներ, որոնք պահանջում են Երևան չտեղափոխել և ազատ արձակել ոստիկանություն բերման ենթարկված, ապա ձերբակալված իրենց համաքաղաքացիներին։ Ըստ շենքի առջև հավաքված հարազատների տեղեկությունների՝ ձերբակալվածներին ոստիկանությունում ծեծի են ենթարկել։ Ոստիկանությունը հերքում է բռնություն գործադրելու մասին տեղեկությունները։ Նշենք, որ բերման ենթարկվածները երեքն են, մի հոգու՝ Նվեր Խաչատրյանին, սխալմամբ են բերման ենթարկել, ապա ազատ արձակել։ Նրա մարմնի վրա բռնության հետքեր կան։ Հավաքվածները պահանջում են, որ կալանավորվածներին չտեղափոխեն մայրաքաղաք և քննությունն իրականացվի Սյունիքում, քանի որ մտավախություն ունեն, որ այնտեղ ավելի դաժան ծեծի կենթարկեն։ Նրանք սպառնում են, որ հակառակ դեպքում ճանապարհ կփակեն, կդիմեն ծայրահեղ քայլերի։ Քաջարանի քաղաքապետ Մանվել Փարամազյանը հայտարարել է, որ իր նկատմամբ քաղաքական ճնշումներ են, օրեր առաջ ոստիկանությունը խուզարկություններ է իրականացրել իր և մերձավորների բնակարաններում, դրան հաջորդել են քաջարանցիների անհիմն ձերբակալությունները՝ բռնության կիրառմամբ:

Հետևեք NEWS.am Medicine-ին Facebook-ում և Twitter-ում