Արցախյան պատերազմում 18-ամյա Էրիկ Օհանջանյանը մասնակցել է Շուշիի համար մղվող մարտերին, որտեղ ծանր վիրավորում է ստացել. փամփուշտը վնասելով նրա ողնուղեղը՝ հայտնվել է թոքի մեջ: Հիմա նա Գերմանիայում վիրահատության կարիք ունի, որը կօգնի նրան նստել հաշմասայլակին: Իսկ մինչ այդ նա կարող է միայն պառկած մնալ:
Էրիկը վիրավորվել է նոյեմբերի 7-ին: Երբ նա ընկել է եւ չի կարողացել գետնից վեր բարձրանալ, նրան թվացել է, թե ոտքերը կտրվել են. նա բացարձակապես ոտքերը չէր զգում: Նույնիսկ չի կարողացել արմունկներին հենված բարձրանալ, որ տեսնի, թե ինչ է կատարվել: Նրա ընկեր եւ ծառայակից Վահեն նրան դուրս է բերել գնդակոծության տակից: Էրիկն ամբողջ ժամանակ գիտակից վիճակում էր եւ հասկանում էր, որ ոչինչ չի կարող անել ինքնուրույն, ու որ ընկերը սեփական կյանքն է վտանգում՝ իրեն օգնելով, եւ Վահեին խնդրել է իրեն սպանել, միայն թե գերի չընկնի, իսկ ինքն էլ փրկվի: Բայց Վահեն ասելով, որ Էրիկը պետք է ապրի, այնուամենայնիվ, կարողացել էր նրան քարշ տալով հասցնել անվտանգ վայր, որտեղից Էրիկին տարհանել էին: Ինքը՝ Վահեն, մնացել էր պաշտպանելու քաղաքն ու մարտերում զոհվել նոյեմբերի 8-ին:
Նաիրա Օհանջանյանը՝ Էրիկի հորաքույրը, NEWS.am Medicine-ի հետ զրույցում հայտնեց, որ վիրավորվելուց հետո արդեն 7-8 ժամ անց Էրիկը Երեւան էր տեղափոխվել՝ Ստեփանակերտում անհրաժեշտ օգնություն ստանալով: Այստեղ վիրահատել են նրա թոքը, սակայն ողնաշարի հետ ոչինչ անել չէին կարող: Երեւանի լավագույն նեյրոավիրաբույժները նրան զննել են, սակայն չեն համարձակվում վիրահատել, քանի որ վիճակը շատ վտանգավոր եւ բարդ է: Սակայն առանց վիրահատության Էրիկը չի կարողանա նույնիսկ նստել:
Գերմանիայում երիտասարդին խոստացել են օգնել. չնայած փաստացի հույս չկա, որ կկարողանա քայլել, սակայն վիրահատությունից հետո Էրիկը կկարողանա գոնե նստել եւ տեղաշարժվել հաշմասայլակով:
Ավելին՝ գերմանացի բժիշկները, տեղեկանալով Էրիկի պատմությանն ու նրա վիրավորման հանգամանքներին, խոստացել են նրան անվճար վիրահատել: Սակայն անալիզների եւ հետազոտությունների, ինչպես նաեւ ստացիոնարում 10 օր անցկացնելու համար պահանջվում է 12 000 եվրո, որոնք երիտասարդի հարազատները հույս ունեն հավաքել կարեկից մարդկանց հանգանակության միջոցով:
Էրիկը լավ նկարում է եւ երազում է դիզայներ դառնալու մասին: Եթե նա կարողանա նստել, նրա երազանքն առավել քան իրականանալի է. նա կկարողանա ստեղծագործել, հետագայում՝ նաեւ աշխատել եւ գումար վաստակել:
Էրիկին օգնել ցանկացողները կարող են ցանկացած չափի գումար փոխանցել հետեւյալ հաշվեհամարին՝
INECOBANK 5406610000503503
Ստացող՝ Naira Ohanjanyan
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր