Գիտնականները շագանակագեղձի քաղցկեղի ախտորոշման նոր մոտեցում են առաջարկել

Նոր համակարգը, որն օգտագործում է արհեստական բանականությունը, կարող է զգալիորեն բարձրացնել շագանակագեղձի քաղցկեղի հայտնաբերման մակարդակը: Դրա օգնությամբ կարելի է մեզի անալիզով ընդամենը 20 րոպեում ախտորոշել այս հիվանդությունը: Անալիզի ճշգրտությունը հասնում է գրեթե 100%-ի:

Ինչպես հաղորդում է Express Computer-ը, շագանակագեղձի քաղցկեղը տղամարդկանց շրջանում ամենատարածված քաղցկեղներից է: Նախնական ախտորոշումը կատարվում է արյան մեջ ՇՀՀ-ի (շագանակագեղձի հատուկ հակագեն) ցուցանիշներով: Սակայն այս մեթոդի ճշգրտությունը հասնում է ընդամենը 30%-ի: Հետեւաբար շատ պացիենտներ ստիպված են անցնել անհարկի եւ ինվազիվ պրոցեդուրա՝ բիոպսիա, որը սպառնում է արյունահոսությամբ եւ ցավային զգացողություններով:

Կորեայի գիտության եւ տեխնոլոգիայի ինստիտուտի հետազոտական խումբը միավորել է արհեստական բանականությունը եւ գերզգայուն բիոսենսորը, որը միաժամանակ կարող է գնահատել շագանակագեղձի քաղցկեղի չորս մարկերի կոնցենտրացիան մեզի մեջ: Արհեստական բանականությանը սովորեցրել են վերլուծել հավաքագրված տվյալները, ինչը թույլ է տալիս առավելագույնս բարձրացնել ախտորոշիչ համակարգի ճշգրտությունը:

Հետևեք NEWS.am Medicine-ին Facebook-ում և Twitter-ում