Երեխաները հաճախ են ականջները ձգում, երբ քնի կարիք ունեն, բայց հիշյալ գործողությունը կարող է նաեւ ինդեկցիայի առկայության մասին վկայել:
«Ականջի ինֆեկցիան, որ նաեւ միջին օտիտ անունով է հայտնի, առավելապես 6 ամսականից 3 տարեկան երեխաների մոտ է հանդիպում», - նշել է մանկական օտոլարինգոլոգ, Քլիվլենդի հիվանդանոցին կից գործող ընտանեկան առողջության կենտրոնի գլխի եւ պարանոցի վիրաբույժ դոկտոր Բրենդոն Հոպկինսը:
Ականջի ինֆեկցիայի տեսակները
Ականջի ինֆեկցիան կարող է վիրուսի կամ մանրէի հրահրմամբ ի հայտ գալ, հատկապես երբ երեխայի մոտ այլ հիվանդություն է նկատվում: Թեւ ինֆեկցիայի որոշ տեսակներ էլ կարող են առանց ուղեկից հիվանդության զարգանալ:
• Սուր ինֆեկցիա. բորբոքման այս տեսակը թմբկաթաղանթի հետնամասում հավաքված հեղուկների անբավարար արտահոսքի արդյունքում է ի հայտ գալիս եւ կարող է որոշ ժամանակով լսողության կորստի հանգեցնել:
• Քրոնիկ ինֆեկցիա. թմբկաթաղանթի հետնամասում հավաքված հեղուկը, այտուցվածությունն ու ինֆեկցիան չի անցնում կամ պարբերաբար՝ վեց ամսվա ընթացքում առնվազն երեք անգամ կրկին ի հայտ է գալիս, ինչը կարող է ականջի առողջությանը երկարաժամկետ կամ անդառնալի վնաս հասցնել:
Ստորեւ ականջի ինֆեկցիաների, դրանց բուժման եղանակների եւ ականջային խողովակների վերաբերյալ՝ ծնողների կողմից դոկտոր Հոպկինսին հասցեագրված մի քանի հարցերի պատասխաններն ենք ներկայացնում.
Որո՞նք են ականջի ինֆեկցիայի ախտանշանները
• Ականջների քաշում կամ ձգում
• Կաթնագույն կամ դեղնավուն, տհաճ հոտով հեղուկի արտահոսք
• Բորբոքուն տրամադրություն
• 38 աստիճանից բարձր ջերմություն
• Վերին շնչառական ուղիների ինֆեկցիա
Ինչպե՞ս են ականջի ինֆեկցիաները բուժվում
Այս պարագայում միշտ չէ, որ կարելի է հակաբիոտիկների օգնությանը դիմել: Բժշկի որոշմամբ, բուժման այլ մոտեցումներ կարող են ընտրվել:
«Երբ երեխայի մոտ ականջի ինֆեկցիան սկսում է պարբերական բնույթ կրել, պետք է բուժման այլ եղանակներ ընտրվեն: Ականջային խողովակներն, օրինակ, կարող են հավաքված հեղուկի արտահոսք, ցավի մեղմում եւ հետագա ինֆեկցիաների կանխարգելում ապահովել», - մեկնաբանել է դոկտոր Հոպկինսը:
Իսկ ո՞ր պարագայում է պետք ականջային խողովակների օգնությանը դիմել
Ականջային խողովակները կիրառվում են, երբ:
• 6 ամիսների ընթացքում ինֆեկցիայի առնվազն 3, կամ մեկ տարվա ընթացքում՝ առնվազն չորս դեպք է գրանցում
• Ինֆեկցիան հնարավոր չէ հակաբիոտիկներով բուժել
• Թմբկաթաղանթի հետնամասում հավաքված հեղուկները լսողության կորուստ են հրահրել, մանավանդ երբ այն ավելի քան 3 ամիս է տեւում:
Իսկ ինպե՞ս են խողովակները տեղադրվում
• Վիրահատությունը ընդհանուր ցավազրկմամբ է իրականացվում, սովորաբար՝ դիմակի միջոցով
• Վիրաբույժը մաքրում է ականջի մեջ հավաքված կեղտը
• Թմբկաթաղանթի վրա փոքրիկ անցքեր են բացվում՝ խողովակների անցկացման համար: Վիրահատությունն, ընդհանուր առմամբ, 10-15 րոպե է տեւում:
• Երբեմն, հետվիրահատական ցավերը մեղմելու նպատակով, սովորական ցավազրկող կարող է նշանակվել
• Ականջի խոնավությունը պահպանելու եւ բուժման գործընթացին նպաստելու համար, կաթիլներ կարող են նշանակվել:
«Ապաքինումը երկար չի տեւում: Վիրահատությունից անմիջապես հետո երեխան կարող է տուն վերադառնալ, հաջորդ օրն իսկ՝ դպրոց հաճախել եւ ընկերների հետ խաղալու գնալ», - նշել է դոկտոր Հոպկինսը:
Իսկ խողովակները հեռացնելու համար է՞լ է վիրահատություն հարկավոր
«Ականջային խողովակները վիրահատությունից հետո՝ երկու տարվա ընթացքում ինքնուրույն ընկնելու հատկություն ունեն: Երեխան նույնիսկ կարող է չնկատել դա», - հավաստիացրել է բժիշկը:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր