Քարոզարշավի հետեւանքով կորոնավիրուսի թվերի որոշակի աճ ենք ունենալու. Անահիտ Ավանեսյան

Նախընտրական քարոզարշավի հետեւանքով Հայաստանում սպասվում է կորոնավիրուսի տարածվածության որոշակի աճ: Այս մասին լրագրողների հետ զրույցում ասաց առողջապահության նախարարի պաշտոնակատար Անահիտ Ավանեսյանը:

Նրա խոսքով, նախորդ 7 եւ 14 օրերի համեմատականները արդեն իսկ ցույց են տալիս վարակվածության մի թոքր աճ:

«Իհարկե պետք է ամեն ինչ անենք, որ այդ աճը չլինի կտրուկ, չլինի մեծ: Պատվաստումները այս ընթացքում պիտի օգնեն, որ մենք խուսափենք նման աճից: Բայց այո, իհարկե, նման տեղաշարժերի ակտիվացումը բոլոր մարզերով, Երեւան քաղաքով, իհարկե իր դերը խաղալու է», - ասաց նախարարի պաշտոնակատարը:

Ընտրությունների օրը, նրա խոսքով, ընտրական բոլոր տեղամասերում գործընթացը պատշաճ ձեւով էր կազմակերպված, եւ թե քաղաքացիները, թե ոստիկանությունը, թե հանձնաժողովի անդամները խիստ կերպով դիմակ էին կրում:

Սակայն նշենք, որ այն ընտրատեղամասերում, որտեղ հունիսի 20-ին եղել են NEWS.am-ի աշխատակիցները, գրեթե ոչ ոք դիմակ չէր կրում: Այդ մասին են փաստում նաեւ այլ լրատվամիջոցների ներկայացուցիչները, ավելացնելով, որ ընտրատեղամասերում նկարահանված տեսանյութերը եւ ֆոտոները իրականությունը չեն արտացոլում, քանի որ հաճախ մարդիկ նկարահանվելիս դիմակ էին դնում, որը հետո անմիջապես հանում էին:

Հետևեք NEWS.am Medicine-ին Facebook-ում և Twitter-ում