COVID-19-ով հոսպիտալացված երեխաների 4 տոկոսի մոտ նյարդաբանական հիվանդություններ են զարգանում. հետազոտություն

Համարվում է, որ երեխաները ավելի հեշտ են տանում կորոնավիրուսային վարակը, քան մեծահասակները, սակայն COVID-19-ով հոսպիտալացված երեխաների 4 տոկոսի մոտ նյարդաբանական հիվանդություններ են զարգացնում: Այս մասին զգուշացրել են Մեծ Բրիտանիայի գիտնականները:  

Medportal.ru-ի փոխանցմամբ՝ գիտնականները վերլուծել են COVID-19-ով հոսպիտալացված մինչեւ 18 տարեկան ավելի քան 1.300 երեխաների տվյալներ: Դուրս գրվելուց հետո նրանցից 52-ի մոտ զարգացել են նյարդաբանական եւ հոգեկան հիվանդություններ: Մասնագետների գնահատականներով՝ միջինում նման խանգարումներ ի հայտ են գալիս կորոնավիրուսային վարակի պատճառով հոսպիտալացում անցած 100 երեխաներից 3.8-ի մոտ՝ առավել հաճախ սեւամորթների եւ ասիացիների մոտ (հիվանդների 69 տոկոսը):

Հետազոտության բոլոր մասնակիցները բաժանվել են երկու խմբի. առաջինում ընդգրկված են եղել առաջնային նյարդաբանական խանգարումով երեխաներ, որոնք կապված են COVID-19-ի հետ, երկրորդում ընդգրկված են եղել բազմահամակարգային բորբոքային համախտանիշով հիվանդներ (MIS-C)՝ նյարդաբանական դրսեւորումներով, ինչը խոչընդոտում է արյան հոսքը դեպի սիրտ: Այն երեխաների մոտ առաջանում է կորոնավիրուսով վարակվելուց մի քանի շաբաթ անց:

Առաջին խմբում ընդգրկված է եղել 27 երեխա, եւ ամենից հաճախ նրանք ունեցել են դեմեյելինացնող հիվանդություններ, որոնց ժամանակ վնասվում է նեյրոնների միելինային թաղանթը եւ խանգարվում է ազդակների փոխանցումը վնասված նյարդերով, ծանր էնցեֆալոպաթիա, Գիլեն-Բարեի համախտանիշ, խորեա (շարժողական խանգարում), փսիխոզ եւ անցողիկ իշեմիկ նոպա:

Երկրորդ խմբի բազմահամակարգային բորբոքային համախտանիշով 25 երեխաների մոտ ախտորոշվել է էնցեֆալոպաթիա, վարքի փոփոխություն, հալյուցինացիաներ եւ ծայրամասային ու կենտրոնական նյարդային համակարգի նշաններ:

Հետազոտության հեղինակները նշել են, որ, MIS-C ունեցող հիվանդների համեմատ, առաջին խմբի երեխաների մոտ գրանցվել են ավելի շատ նեյրոիմունային խանգարումներ: Սակայն բազմահամակարգային բորբոքային համախտանիշով հիվանդները ավելի հաճախ էին վերակենդանացման բաժանմունքում հայտնվում: Հիվանդանոցից դուրս գրվելիս տարբեր բարդությունների պատճառով առաջին խմբի երեխաների 33 տոկոսը ունեցել է հաշմանդամություն, MIS-C ունեցող հիվանդների շրջանում` 28 տոկոսը, մեկ այլ երեխա մահացել է ինսուլտի հետեւանքով:

Հետևեք NEWS.am Medicine-ին Facebook-ում և Twitter-ում