• Latest news

Առողջության համապարփակ ապահովագրության վճարները կարող են լինել աշխատավարձի մոտ 3 տոկոսի չափով. փոխնախարար

18 հունվարի, 2022  14:10

Ըստ նախնական հաշվարկների՝ Առողջության համապարփակ ապահովագրության վճարները կարող են լինել աշխատավարձի 3 տոկոսի չափով: Այս մասին լրագրողների հետ զրույցում ասաց ՀՀ առողջապահության նախարարի առաջին տեղակալ Լենա Նանուշյանը:  

Նրա խոսքով, ապահովագրավճարների չափի հաշվարկներն արվել են՝ հիմնվելով այժմ քննարկվող բուժծառայությունների փաթեթի վրա: Սակայն եթե փաթեթը ընդլայնելու որոշում կայացվի, ապահովագրավճարների չափը եւս կաճի, եւ ընդհակառակը, ավելի սահմանափակ ծառայություններ ներառող փաթեթի համար ավելի փոքր չափով վճարներ կպահանջվեն:

Ինչպես նշեց փոխնախարարը, Առողջության համապարփակ ապահովագրության համար պետք է վճարի թե գործատուն եւ թե աշխատողը՝ աշխատավարձի մոտ 3-ական տոկոսի չափով:

Ապահովագրությամբ առաջարկվող ծառայությունների փաթեթը մշակելու համար մասնագետները ուսումնասիրել են հիվանդացության տվյալները՝ պարզելու համար, թե ինչպիսի խնդիրներով են քաղաքացիներն ամենից հաճախ հիվանդանոց դիմում: Ձեւավորված փաթեթը, Նանուշյանի խոսքով, 90-95 տոկոսով փակում է ամենատարածված ծառայությունների սպեկտրը:

Ինչպես նշեց Լենա Նանուշյանը, այժմ քննարկվող փաթեթը ներառում է ստոմատոլոգիական որոշ ծառայություններ (սակայն ոչ թանկարժեք միջամտություններ, որոնց թվին է պատկանում, օրինակ, իմպլանտների տեղադրումը), բազմաթիվ վիրահատական ծառայություններ՝ բացառությամբ նորագույն տեխնոլոգիաների կիրառում պահանջողները, որոնցից շատերը Հայաստանում հասանելի էլ չեն: Փոխպատվաստման ծառայություններ ցանկում եւս ներառված են, ինչպես նաեւ սիրտ-անոթային հիվանդությունների թերապեւտիկ եւ վիրահատական բուժում: Քրոնիկ հիվանդությունների բուժման մեջ կիրառվող որոշ դեղեր եւս կտրամադրվեն ապահովագրությամբ:

Ինչ վերաբերվում է օնկոլոգիական հիվանդություններին, դրանց որոշ մասը պետությունը արդեն իր վրա է վերցրել: Քիմիաթերապիան պետպատվերից դուրս էր մնացել, սակայն ապահովագրությունը դա որոշ չափով կծածկի:

«Հաշվարկել ենք, թե միջինում ինչքան է ծախսվում մեկ հիվանդի վրա, այդ միջին հաշվարկը ներառել ենք փաթեթի մեջ», - նշեց փոխնախարարը:

Նրա խոսքով, շատերը գումար չունենալու պատճառով հետաձգում են բժշկի գնալը: Նրանց հիվանդությունը այդ ընթացքում ավելի է խորանում, եւ մասնագետների մոտ նրանք հայտնվում են արդեն բավական ծանր վիճակում: Ապահովագրության ներդնումը, փոխնախարարի խոսքով, կօգնի կանխել նման խնդիրները, քանի որ մարդիկ կսկսեն ժամանակին բժշկի դիմել:

Հետևեք NEWS.am Medicine-ին Facebook-ում և Twitter-ում


 
  • Տեսանյութեր
 
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է