Nature. MFGE8 սպիտակուցի արգելափակումը ողնաշարը պաշտպանում է քաղցկեղի մետաստազներից

Կոռնելի համալսարանի գիտնականները պարզել են, որ ողնաշարի ոսկրերի նախնի-ցողունային բջիջները արտազատում են MFGE8 կոչվող սպիտակուցը, որը նպաստում է քաղցկեղի մետաստազավորմանը։ Բացահայտումը կարող է պարզաբանել, թե ինչու են ուռուցքները հաճախ տարածվում ողնաշարի վրա, և կարող է նաև օգնել մետաստազների դեմ  նոր բուժում գտնելու համար, որոնք ուղղված կլինեն  MFGE8-ի արգելափակմանը։ Հետազոտությունը հրապարակվել է Nature ամսագրում:

Նախորդ ուսումնասիրությունների ընթացքում հեղինակների  թիմը և այլ գիտնականներ պարզել էին, որ տարբեր տեսակի ոսկորներ ձևավորվում են տարբեր ցողունային բջիջներից: Նոր աշխատանքում կենսաբանները ցույց են տվել, որ ողնաշարի ոսկորներն առաջանում են հատուկ ցողունային բջիջներից, որոնք արտազատում են MFGE8 սպիտակուցը:

Նրանք նաև պարզել են, որ այս մոլեկուլը նպաստում է չարորակ ուռուցքների մետաստազների տարածմանը։ Հայտնի է, որ հատկապես ողնաշարն է քաղցկեղի բջիջների տարածման մեծ վտանգի տակ։ Ավանդական տեսությունը, որը սկիզբ է առել 1940-ականներից, այն էր, որ այս երևույթը պայմանավորված է արյան հոսքի առանձնահատկություններով, որոնք առավելապես  մետաստազները տեղափոխում են դեպի ողնաշար, այլ ոչ թե վերջույթների երկար ոսկորներ: Բայց այս գաղափարը չի հաստատվել։

Թիմը նաև պարզել է, որ ողնաշարի ցողունային բջիջների հեռացումը ողնաշարի ոսկորները պակաս գրավիչ թիրախ է  դարձնում քաղցկեղի մետաստազների համար:

Գիտնականներն արդեն նույնականացրել են  մկների ողնաշարի ցողունային բջիջների մարդկային նմանակները և ուսումնասիրել դրանց հատկությունները: Հետազոտողները ներկայումս ուսումնասիրում են MFGE8 սպիտակուցն արգելափակելու մեթոդները՝ քաղցկեղով հիվանդների մոտ ողնաշարի մետաստազների ռիսկը նվազեցնելու համար:

Հետևեք NEWS.am Medicine-ին Facebook-ում և Twitter-ում