Երեւանում ստորագրվել է կեղծ դեղերի դեմ պայքարում համագործակցության Հուշագիր

Երեւանում այսօր, մայիսի 26–ին, «Եվրասիական տարածաշրջանում կեղծ դեղամիջոցների դեմ պայքարի արդի ասպեկտներ» թեմայով տարածաշրջանային գիտաժողովի շրջանակում ստորագրվել է կեղծ դեղամիջոցների դեմ պայքարում համագործակցության Հուշագիր։ Հուշագիրը ստորագրել են ՀՀ Առողջապահության նախարարության դեղերի եւ բժշկական տեխնոլոգիաների փորձագիտական կենտրոնի տնօրեն Հակոբ Թոփչյանը, Ինտերպոլի ներկայացուցիչ Սեսիլիա Ֆանտը, Եվրոպայի,  Մերձավոր Արեւելքի եւ Ասիայի դեղերի անվտանգության ինստիտուտի տնօրեն Էշլի Հոուն, Կոնտրաֆակտի դեմ պայքարի միջազգային ինստիտուտի (IRACM) ուսուցման գծով տնօրեն Վիլֆրեդ Ռոժեն, ինչպես նաեւ Հայաստանում ներկայացված հայտնի դեղագործական ընկերությունների անվտանգության գծով տնօրենները։

Իր ողջույնի խոսքում առողջապահության փոխնախարար Սերգեյ Խաչատրյանը նշեց, որ գիտաժողովի թեման շատ ակտուալ է Հայասանի համար, եւ կեղծ դեղերի դեմ պայքարը ՀՀ ԱՆ առաջնահերթություններից է։

Նա հիշեցրեց, որ այժմ Ազգային ժողովում է գտնվում «Դեղերի մասին» նոր օրինագիծը, որը առաջին անգամ հստակ սահմանում է, ինչ է կեղծ դեղը։ «Կեղծ դեղերի դեմ լավագույն պայքարը դեղերի շրջանառության կարգավորումն է, ինչը նոր օրենքը թույլ կտա իրականացնել», – ասաց նա եւ հավելեց, որ օրենքը ընդունելուց հետո ընդունվելու են նաեւ մոտ 50 կարգավորող փաստաթղթեր, որոնք եւ կկանխեն կեղծ դեղերի շրջանառությունը Հայաստանում։

Ս. Խաչատրյանը նաեւ նշեց, որ Հայաստանը միացել է MEDICRIME միջազգային կոնվենցիային։ Այս Կոնվենցիան եւս Ազգային ժողովում է, եւ դրա վավերացման հարցն ընդգրկված է հերթական քառօրյա նիստի օրակարգում։  

ԱՀԿ Հայաստանյան գրասենյակի ղեկավար Թաթուլ Հակոբյանը իր խոսքում նշեց, որ կեղծ դեղերի շրջանառության հարցը մշտապես գտնվում է ԱՀԿ ուշադրության կենտրոնում, եւ կազմակերպությունը մշակում է տարբեր ռազմավարություններ այս խնդրի դեմ պայքարելու համար։ Թ.Հակոբյանը մի քանի գործառույթ առանձնացրեց՝

1. Որակի մշտադիտարկում, այսինքն տեսչական գործառույթ եւ հսկողություն լաբորատոր փորձաքննությունների միջոցով;
2. Դեպքերի վերաբերյալ ահազանգման հետքային եւ հետեւող գործառույթ;
3. Տեղեկատվական գլոբալ տարածաշրջանային համակարգի ներդնում։

ԱՀԿ Հայաստանյան ներկայացուցիչը նշեց, որ այս բոլոր գործառույթներն իրականացնելու համար անհրաժեշտ է հզոր, մեծ լիազորություններով օժտված մարմին։ «Ամենակարեւոր որոշումը, որ ԱՀԿ–ն ակնկալում է երկրներից, դա քաղաքական որոշումն է՝ երկրում հզոր, կայուն, կարգավորիչ մարմնի գոյության մասին։ Այն երկրները, որոնք հաջողել են ստեղծել այդպիսի մարմիններ, եւ պետությունները պատվիրակել են նրանց ամբողջ լիազորությունները, այդ երկրները հաջողել են իրենց աշխատանքներում։ Մասնագիտական շարունակական մոտեցում եւ հզոր կարգավորիչ մարմին՝ ահա այն բանաձեւը, որ ԱՀԿ–ն առաջարկում է երկրներին, այդ թվում նաեւ Հայաստանին, որտեղ բոլոր հիմքերը կան արդյունավետ գործունեության համար», – ասաց նա։

NEWS.am Medicine-ի թղթակցի հետ զրույցում ՀՀ Առողջապահության նախարարության դեղերի եւ բժշկական տեխնոլոգիաների փորձագիտական կենտրոնի տնօրեն Հակոբ Թոփչյանը նշեց, որ գիտաժողովի ընթացքում քննարկվելու են կեղծ դեղերի շրջանառության դեմ պայքարի հիմնական ասպեկտները, կկատարվի փորձի եւ տեսակետների փոխանակում, կներկայացվեն կեղծ դեղերի հայտնաբերման նոր տեխնոլոգիաները, եւ այլն։ «Այսինքն, նպատակը մեկն է՝ ապահովել շուկայում որակյալ, արդյունավետ դեղ», – ասաց նա, եւ հիշեցրեց, որ մեր հանրապետությունում կեղծ դեղերի արտադրությունն ու շրջանառությունը քրեորեն պատժվում է։

Հ. Թոփչյանը պարզաբանեց, որ կեղծ դեղ հասկացությունը իր մեջ լայն շրջանակ է ներառում՝ վերափաթեթավորված, ժամկետանց, չգրանցված, անօրինական ձեւով ներկրված, ինչ–որ նկուղում արտադրված դեղ, եւ սրանք տարբեր մոտեցումներ են պահանջում, «բայց նպատակը մեկն է՝ դաշտում պետք է լինեն դեղեր, որոնք պետությունը գրանցել է, ճանաչում է, եւ երաշխավորում է որակն ու անվտանգությունը»։

Գիտաժողովը կազմակերպվել է ՀՀ Առողջապահության նախարարության դեղերի եւ բժշկական տեխնոլոգիաների փորձագիտական կենտրոնի եւ Սանոֆի Ավենտիս դեղագործական ընկերության տարածաշրջանային անվտանգության հարցերով տնօրենի համատեղ ջանքերով։ Գիտաժողովին մասնակցում են Հայաստանի դեղարտադրող եւ ներմուծող ընկերությունների, հայտնի դեղագործական ընկերությունների հայաստանյան եւ տարածաշրջանային գրասենյակների ներկայացուցիչներ։ Գիտաժողովը կտեւի երկու օր՝ մայիսի 26–ին եւ 28–ին։

Հետևեք NEWS.am Medicine-ին Facebook-ում և Twitter-ում