• Latest news

Հայաստանում առաջին անգամ կատարվել է կրծքագեղձի բարձրադաշտ ՄՌՏ հետազոտություն

9 փետրվարի, 2016  11:34

Կրծքագեղձի քաղցկեղը ամենատարածված չարորակ նորագոյացությունն է կանանց շրջանում, հիվանդացությունը տարեցտարի աճում է: Աշխարհում տարեկան ախտորոշվում է կրծքագեղձի քաղցկեղի մոտ 1,7 մլն նոր դեպք: Այդ հիվանդության վաղ հայտնաբերումը եւ ճիշտ ախտորոշումը համաշխարհային առողջապահության առաջնային խնդիրներից է։

Կրծքագեղձի նորագույն հետազոտությունների մասին NEWS.am Medicine-ի թղթակիցը զրուցել է ԿՀՄԻ ԲԱԿ-Երեւան ՄՌՏ բաժանմունքի վարիչ, բժիշկ-ռադիոլոգ Նարեկ Մատինյանի հետ:

Որո՞նք են կրծքագեղձի հետազոտման ժամանակակից մեթոդները:

Կրծքագեղձի գործիքային հետազոտման հիմնական մեթոդներն են ռենտգեն մամոգրաֆիան, ուլտրաձայնային հետազոտությունը (սոնոգրաֆիա), իսկ վերջին տարիներին ամենահավաստի ոչ ինվազիվ եւ անվնաս հետազոտման մեթոդը մագնիսա-ռեզոնանսային տոմոգրաֆիան (ՄՌ-մամոգրաֆիա) է: Ի դեպ, տեղեկացնեմ, որ վերջերս մեր կենտրոնում եւ առաջին անգամ Հայաստանում կատարվեց կրծքագեղձի ՄՌՏ բարձրադաշտ տոմոգրաֆի միջոցով: Մինչեւ այժմ այդ հետազոտության համար հայ պացիենտները ստիպված մեկնում էին արտերկիր:

Կնկարագրե՞ք` ի՞նչ մեթոդ է մագնիսա-ռեզոնանսային տոմոգրաֆիան:

Մագնիսա-ռեզոնանսային տոմոգրաֆիան (ՄՌՏ) բժշկական գործիքային հետազոտման բացարձակ անվնաս մեթոդ է, որը թույլ է տալիս մանրակրկիտ հետազոտել օրգանիզմի գրեթե ցանկացած հատված, ստանալ շերտավոր եռաչափ (3D) պատկերներ եւ հայտնաբերել հիվանդությունները շատ վաղ փուլում:

Ի՞նչ առավելություններ ունի կրծքագեղձի ՄՌՏ-ն այլ ախտորոշիչ մեթոդների նկատմամբ:

ՄՌՏ–ն հնարավորություն է ընձեռում ստանալ կրծքագեղձի շերտավոր եռաչափ պատկերներ, ինչը թույլ է տալիս հայտնաբերել նույնիսկ ամենափոքր (1մմ) օջախները: Ինչպես նշեցի, այն ռենտգենյան ճառագայթում չի կիրառում եւ օրգանիզմի համար անվնաս է: ՄՌՏ-ով հնարավոր է ոչ միայն պարզել այլ մեթոդներով հայտնաբերված օջախների բնույթը, այլեւ տեսնել այնպիսի փոփոխություններ, որոնք չեն երեւացել ռենտգեն-մամոգրաֆիկ կամ ուլտրաձայնային հետազոտություններով: Մեզ հաճախ դիմում են պացիենտներ, որոնք ունեն գանգատներ, հետազոտվել են, սակայն չունեն հստակ ախտորոշում: Քիչ չեն նաեւ այն պացիենտները, որոնք ընտրում են մագնիսա-ռեզոնանսային տոմոգրաֆիան որպես առաջնային հետազոտման մեթոդ:

Ո՞ր դեպքերում է անհրաժեշտ անցնել ՄՌՏ հետազոտություն։

ՄՌՏ–ն ցուցված է կատարել կրծքագեղձում բարորակ կամ չարորակ նորագոյացությունների առկայության կամ կասկածի դեպքում: Այն շատ ինֆորմատիվ է նաեւ մաստոպաթիաների եւ բորբոքային պրոցեսների ախտորոշման, ինչպես նաեւ հետվիրահատական փոփոխությունների գնահատման հարցում:

Հատուկ ուզում եմ նշել, որ ՄՌՏ–ն լավագույն մեթոդն է կրծքագեղձի հիվանդությունների բուժման (վիրահատություն, քիմիոթերապիա, ճառագայթային թերապիա) արդյունավետությունը գնահատելու համար: Կրծքագեղձի քաղցկեղ հայտնաբերելուց հետո անպայման խորհուրդ է տրվում անցնել այլ օրգանների, օրինակ` գլխուղեղի ՄՌՏ հետազոտություն, հավանական երկրորդային բնույթի օջախների` մետաստազների բացառման համար:

ՄՌՏ–ն օգտագործվում է նաեւ կրծքագեղձում հայտնաբերված օջախի բիոպսիան պլանավորելու եւ կատարելու համար: ՄՌՏ արդյունքների հիման վրա որոշվում է, թե արդյոք կարիք կա բիոպսիա կատարելու, թե ոչ:

ՄՌՏ–ն լայնորեն կիրառվում է նաեւ կրծքագեղձի իմպլանտների հետազոտման նպատակով: Այն հնարավորություն է տալիս գնահատել տեղադրված իմպլատների ամբողջականությունը, կառուցվածքը, ձեւը եւ տեղակայումը, ինչպես նաեւ ուսումնասիրել հարակից հյուսվածքների վիճակը:

Ի՞նչ խորհուրդ կտաք մեր ընթերցողներին:

Բոլորին խորհուրդ կտամ հետեւել առողջությանը եւ դիմել բժշկի ցանկացած գանգատի դեպքում: Կանանց խորհուրդ եմ տալիս կրծքագեղձերի հետ կապված նույնիսկ չնչին գանգատների դեպքում դիմել համապատասխան մասնագետի եւ անհապաղ հետազոտվել ժամանակակից մեթոդներով, քանի որ քաղցկեղի վաղ ախտորոշումը մեծացնում է բուժման արդյունավետությունը:

 

 

 

Հետևեք NEWS.am Medicine-ին Facebook-ում և Twitter-ում


  • Այս թեմայով
 
  • Կարդացեք նաև
 
  • Իրադարձությունների օրացույց
 
 
  • Արխիվ
 
  • Ամենաընթերցվածը

ամիս

շաբաթ

օր

 
  • Հետեվեք մեզ Ֆեյսբուքում
 
  • Հարցում
Տեղյա՞կ եք արդյոք, որ 2027թ.–ից ՀՀ բոլոր քաղաքացիների համար պարտադիր է դառնալու բժշկական ապահովագրությունը
Տեղյակ եմ եւ կողմ եմ
Տեղյակ եմ եւ դեմ եմ
Տեղյակ եմ, դեռեւս չեմ կողմնորոշվում
Տեղյակ չեմ, բայց սկզբունքորեն կողմ եմ
Տեղյակ չեմ, բայց սկզբունքորեն դեմ եմ
Ինձ համար միեւնույն է